Abitante Masin-Lidun, uza vero hodi hakat liu Lagoa Tasi-Tolu, domingu (25/04/21). Imajen Tatoli/António Gonçalves.

DILI, 01 maiu 2021 (TATOLI) – Família uma-kain 68 hela iha Masin-Lidun, Tasi-Tolu, ne’ebé evakua ba bairru Besi-tua, João Paulo II, seidauk hetan apoiu nesesidade báziku hosi Governu inklui mós ajénsia ka grupu ne’ebé servisu bá asaun karidade.

Notísia Relevante : Família 100-resin iha bairru Besi-Tua deklara fila-ba uma

Xefe Bairru Besi-Tua no ekipa João Paulo II, Agostinho Gomes, informa família uma-kain 68 mak to’o agora seidauk hetan apoiu tanba sira laiha kartaun eleitorál.

“Hosi inísiu kuandu Governu mai fornese apoiu nesesidade bázika iha area uma adat Tasi-Tolu, sira telefone direita hodi husu eleitorál mai ha’u no ha’u  konsege halibur eleitorál lubuk ida, maibé falta de’it uma-kain 68 mak la konsege rekolla tanba momentu sira halai sai hosi uma la lori kualkér dokumentu ida,” Agostinho haktuir ba jornalista sira iha Bairru  Besi-Tua, Tasi-Tolu, Dili, sábadu ne’e.

Xefe ekipa João Paulo II ne’e afirma katak nia mós antes ne’e la hetan informasaun kona bá fornesimentu apoiu nesesidade bázika bá vítima kalamidade ne’ebé mak hela iha kampu refujiadu. Eleitorál ne’ebé nia rekolla tuir orientasaun Governu nian ne’e la hatene atu saida. Maibé depois nia buka tuir fali maka foin hatene katak to’o agora uma-kain 68 la simu apoiu ne’e  tama laiha eleitorál .

Hanesan autoridade bairru, Agostinho akresenta nia nafatin esforsu atu uma-kain 68 ne’e bele hetan fali sira-nia direitu. Maske sira laiha eleitorál, maibé sira vítima duni hosi akontesimentu dezastre naturál, 04 abríl liubá ne’e.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here