Primeiru-Ministru, Taur Matan Ruak. Imajen TATOLI/Egas Cristóvão

DILI, 01 maiu 2021 (TATOLI)- Iha loron 01 maiu 2021, mundu tomak no Timor-Leste selebra Loron Internasionál Traballadór nian, ne’ebé komunidade Katólika mós selebra nu’udar loron Saun José Operáriu nian, ho objetivu atu rekoñese no valoriza kna’ar traballadór sira-nian iha sosiedade.

“Traballadór-sira nu’udar eroi foun sira iha faze Dezenvolvimentu Nasionál daudaun ne’e nian no liuhosi sira mak ita harii nasaun ida-ne’ebé forte, riku no seguru,” Primeiru-Ministru (PM), Taur Matan Ruak hateten liuhosi nota imprensa ne’ebé Agência Tatoli simu iha sábadu ne’e.

Xefe Governu ne’e hatutan, loron traballadór nian la’ós de’it feriadu ka loron deskansa nian ida, maibé sai nu’udar biban ida ne’ebé di’ak tebetebes atu hahí empeñu, méritu, dixiplina, profisionalizmu, serbisu iha ekipa, espíritu sakrifísiu nian no kumprimentu devér nian, ne’ebé horik nafatin iha traballadór sira, tantu nasionál nune’e mós estranjeiru-sira, ne’ebé habelar iha setór oioin hosi Timor-nia ekonomia no administrasaun públika, ne’ebé kontribui maka’as ba produtividade no atu nasaun Timor-Leste hakat ba oin iha ritmu ne’ebé di’ak.

Traballadór sai nu’udar bensaun no rikusoin loloos ida hosi família, komunidade, empreza, instituisaun ka nasaun ida, justu duni atu selebra ezemplu di’ak liu sira kona-ba serbisu no exelénsia, hanesan fonte enkorajamentu no inspirasaun nian hodi hasoru dezafiu sira husi dezenvolvimentu.

Ba traballadór timoroan no estranjeiru hothotu ne’ebé kontribui ho laran tomak ba Timor-Leste ida-ne’ebé modernu, dezenvolvidu no prósperu liután.

“Ha’u hakarak tebes, hodi ha’u nia naran rasik no Governu nia naran, hato’o ami-nia agradesimentu ne’ebé boot tebetebes ba esforsu no serbisu hotu ne’ebé traballadór-sira halo iha momentu ne’ebé ita luta hela hasoru Surtu Covid-19,” Taur Matan Ruak afirma.

Jornalista       : Antónia Gusmão

Editór             : Cipriano Kolo

1 KOMENTÁRIU

  1. Refleksaun ida hodi it’s hanoin hamutuk

    Loron ida ne importante ba trabalhador sira hotu. Maibe barak lakon sira nia servisu tamba pandemia ne halo trabalhador sira lakon sira nia direito $115, tuir estudo BARAK ho salariu $115 dollar la suficiente tebes ba trabalhador sira nebe hela iha Dili no municipio seluk. Funcionario sira ho salariu nivel 4 mos obriga tengki deve ona molok fulan too atu simu salariu.

    Exemplo ida.
    Familia ida iha oan 8, nain 4 eskolah iha “eskolah balun IHA Dili laran” fulan2 seluk $12, fulan ida $48, kada fulan han fos saka 4 ho folin $ 14 Significa fulan ida $58, modo “mostarda folin 0.50 cent Hamutuk $60 kada fulan, transporte fulan2 $20 dollar ba sira nain4. Nain 1 universitariu gasto kada fulan $25, aumenta ho propinas semester 2 nian $230, Covid halo sira lakon servisu maske la covid mos osan la too nafatin hodi sustenta sira nia MORIS fulan2 tamba $211 dollar mak gasta se inklui mos propinas universidade nian $441 maibe simu deit $115 oinsa sira bele hadia sira nia an.

    Gasto hanesan ne mos mosu ba trabalhador funcionario nebe ho nivel 1-4, gasto BARAK liu rendemento tamba ejigensia familia nian.

    Hein katak Governo hanoin ona atu oinsa povu bele hadia sira nia MORIS.

    Obrigado
    Supports nafatin politika hotu maibe hare ba karik keta hare ba leten deit.
    Hanoin povu ba. Keta hanoin deit politika, hafiar imi hotu politik nain sira hanoin povu maibe keta IHA ibun deit. Maibe hatudo ho pratika.

    HAU fiar Nai PR, PM, membro PN, Governo sira bele hadia ida ne.

    Nai bensa TL
    Nai bensa Ukun Nai sira
    Viva Timor-Leste

HAKEREK NO HATÁN

Please enter your comment!
Please enter your name here