Ekipa médiku halo teste swab ba komunidade aldeia 03 Suku Fatuhada, Dili, kuarta (17/03/21). Imajen Tatoli/António Gonçalves.

DILI, 01 maiu 2021 (TATOLI)-Ekipa  Saúde  hosi Pilar ida too ualu  halo screening masál   ba komunidade Aldeia 01, 02, 03, no  Aldeia 05, Suku Fatuhada,  Postu Administrativu  Don Aleixo, Munisípiu Dili.

‘’Regra ne’ebé mak agora daudaun iha Estadu emerjénsia ba dala XIII  iha dekretu Governu ne’e obrigatóriu atu halo screening masál,  maibé ita lakohi hateten ba populasaun atu uza forsa, maibé estadu agora ne’e loron 14  konfinamentu obrigatóriu no  teste obrigatóriu entaun ita buka nafatin disemina informasaun  atu populasaun mós la bele ta’uk,” vise-koordenadora Forsa Tarefa Prevensaun Metigasaun Surtu COVID-19 iha Timor-Leste, Odete da Silva Viegas, informa  ba jornalista sira iha Aldeia 03, Fatuhada, Dili, sábadu ne’e.

Nia informa sábadu ne’e sira halo ba Suku Fatuhada no domingu aban kontinua ba suku seluk tanba ne’e husu ba abitante sira para  bele  koopera no kolabora de’it  hodi bele partisipa iha swab teste ne’e.

Agora daudaun ekipa na’in-10 mak tun terrenu koordena ho xefe suku no  xefe aldeia  sira karik iha família ida ne’ebé mak isin manas mear entaun ekipa sira tun ba halo swab.

Odete da Silva Viegas  haktuir,  ekipa Saúde hahú kedas pilár ida to’o ualu hala’o kedas servisu ida-ne’e   maibé planu   screening ba área sira ne’ebé mak risku  boot  hanesan suku Fatuhada  mak iha númeru  COVID-19  boot no tuir mai maka   Bebonuk no mós  fatin seluk.

Iha planu mós atu  tama sai uma entaun agora daudaun ekipa balun atu lao tama sai uma halo screening masál para haree iha ema ruma  mak isin-manas no  mear  husu sira-nia kolaborasaun  no kooperasaun para bele foti sira nia amostra.

Jornalista   : Felicidade Ximenes

Editór        : Francisco Simões

HAKEREK NO HATÁN

Please enter your comment!
Please enter your name here