Diretór Ezekutivu CNC, I.P, Hugo Maria Fernandes. Imajen TATOLI/Joanico de Araújo

DILI, 01 maiu 2021 (TATOLI)-Diretór Ezekutivu Centro Nasionál Chega (CNC), Hugo Maria Fernandes, hateten durante situasaun Serka Sanitária (SS) CNC hala’o atividade tuir planu trimestrál nian ne’ebé mak halo koordenasaun ho parte hotu ne’ebé servisu hamutuk ho CNC.

Hugo Fernandes hatutan, atividade hosi planu trimestrál ne’ebé halo koordenasaun ne’e, loloos ba Munisípiu hotu, maibé tanba ho situasaun Estadu Emerjénsia no SS entaun sira halo koordenasaun konsentra liu iha Dili mak hanesan halo koordenasaun ho Ministériu Saúde ko’alia kona-ba hadi’a prosesu reabilitasaun Ospitál Lahane sai nu’udár sentru konfinamentu izolamentu pasiente COVID-19.

“Ospitál Lahane nu’udár sítiu istóriku ida, ami koordena ho Ministériu Saúde halo manutensaun reabilitasaun fatin ne’e labele muda arkitetura orijinál ospitál ninian,” Hugo Maria Fernandes ba Agência Tatoli liuhosi telefónika, sábadu ne’e.

CNC halo mós koordenasaun ho Ministériu Edukasaun Juventude no Desportu (MEJD) halo avaliasaun kurríkulu ba Ensinu Segundu siklu oinsá istória Timor nian mós hola parte hotu kurríkulu eskola nian.

CNC mós halo koordenasaun ho universidade sira hanesan, Universidade da Paz (UNPAZ), Universidade Nasionál Orientál Timor Lorosa’e (UNITAL) no Universidade Dili (UNDIL) ko’alia kona-ba oinsá universidade sira halo peskiza istória iha komunidade ida istória ida.

“Atividade sira ne’e mak ami halo iha Dili durante periodu Estadu Emerjénsia, no serka sanitária, tanba ne’e atividade ne’ebé ami halo ne’e foin halo kooperasaun seidauk iha prosesu implementasaun atividade nian,” nia dehan.

Diretór ezekutivu CNC ne’e dehan, durante sira hala’o atividade programa koordenasaun ho parseiru sira, dezafiu boot ne’ebé sira enfrenta mak regra Estadu Emerjénsia halo sira labele halo movimentu hosi Dili ba munisípiu sira atu implementa programa trimestral ninian.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here