Komunidade no estudante hala’o hela teste swab iha CCD, tersa (27/04/21). Imajen Tatoli/António Gonçalves.

DILI, 01 maiu 2021 (TATOLI)—Sala Situasaun Sentru Integradu Jestaun Krize (SIJK), deteta kazu pozitivu COVID-19 foun hamutuk 120, kazu rekoperadu na’in 43 no totál kazu ativu 1.239.

“Kazu detetatu foun 120, iha Dili 116, iha munisípiu seluk haat. Hosi númeru ne’e iha mane 62, feto 58, asintomátiku na’in 114 (95%), restu sintomátiku,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, sábadu ne’e.

Notísia relevante:COVID-19: pozitivu 86, rekoperadu 47 no ativu 1.162

Hosi totál kazu detetadu foun ohin, 51 (42,5%) mak deteta pozitivu tanba halo teste ho razaun atu halo viajen ka halo ona viajen ba munisípiu ka estranjeiru. Tanba ne’e, totál kazu konfirmadu kumulativu iha 01 maiu sura hosi 21 marsu 2020 hamutuk 2.396.

Hosi horisehik mai ohin, hamutuk hotu Laboratóriu Nasionál Saúde halo testes PCR  1.169 iha Dili, ho detalla hanesan tuir mai, Vijilánsia sentinela 70, Rastreiu ba kontaktu ka Contact tracing 147, Rastreiu Aleatóriu ka Random Screening 334,  Viajen sai hosi serka sanitária Munisipiu Dili 575,  Viajen internasionál  ualu,  Follow up iha kuarentena  55.

Totál teste PCR ne’ebé halo horisehik 30 abríl iha munisípiu sira-seluk hamutuk 328, ho detalla hanesan tuir mai, Baucau 165, Ermera 50, Maliana 42, Maubisse laiha, RAEOA laiha, Suai 20, Viqueque 51,  Teste follow up ba sira iha fatin izolamentu 62 kompostu hosi 43 negativu ona no 19 sei nafatin pozitivu.

SIJK informa mós katak, atu bele hatene surtu ida ninia evolusaun, no mós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia. Konvensionalmente insidénsia sukat totál kazu foun, kada loron, pur abitante rihun 100, no hatudu risku ne’ebé populasaun iha atu hetan da’et moras ida.

“Ohin, hosi insidénsia COVID-19 iha TL durante loron hitu ikus maka 6,4/abitante rihun 100, enkuantu ba de’it munisipiu Dili ohin loron nian 20,7/abitante rihun 100. Insidénsia ohin nian iha mudansa oitoan kompara ho hirak ne’ebé publikadu ona loron hirak liu-bá, tanba ajusta fali totál populasaun ba estimativa tinan 2021,” Rui Maria de Araújo, esplika.

Tuir SIJK, insidénsia iha leten sei nafatin hatudu katak, munisípiu Dili mak fatin iha risku bo’ot liu atu populasaun hetan da’et virus SARS-CoV-2.

Iha 01 maiu 2021, izolamentu Vera Cruz halo tratamentu ba kazu detetadu na’in 28. Iha área obstetrisia na’in-ulau, sirurjia ida, medisina interna na’in 16, pediatria na’in-tolu. Sira na’in-ualu  iha obstetrisia, kategoria moderadu hotu, sira-nia kondisaun estável.

“Kazu sirurjia ida tanba asidente tránzitu, no iha ‘Severe Head Injury’ no mós detetadu pozitivu COVID-19. Oras ne’e uza oksijéniu. Sira na’in 16 iha medisina interna, 10 grave, neen moderadu. Hosi grupu grave, ida uza ventiladór ho trakeostomia, na’in-sia seluk uza oksijéniu. Kazu tolu pediatria, rua moderadu, na’in-ida grave. Na’in ida grave uza CPAP, no rua moderadu la uza ona oxijéniu,” nia dehan.

Informa mós ba públiku katak, hosi 1 to’o 30 abríl iha ema na’in 59 mak hetan autorizasaun hala’o autoizolamentu, ka Izolamentu terapêutiku obrigatóriu iha uma-rasik, tuir regra ne’ebé Governu define ona. Hosi totál ne’e, na’in-hitu rekoperadu ona.

Aproveita mós informa katak, para alén de uma-rasik, tenki prienxe kritériu mínimu, ema ne’ebé sintomátiku lijeiru, ka iha moras seluk ka comorbidade sei la hetan autorizasaun atu hala’o autoizolamentu.

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka sanitária no konfinamentu domisiliáriu ne’ebé Konsellu Ministru deside ona, implementa hahú 30 abríl.

SIJK Husu atu hotu-hotu kolabora ho autoridade saúde-sira hodi bele buka-tuir ema hotu ne’ebé hetan da’et ona virus ne’e, no izola hosi ema ne’ebé seidauk hetan da’et-tutan.

Jornalista: Tomé Amado

Editór: Francisco Simões

HAKEREK NO HATÁN

Please enter your comment!
Please enter your name here