Aviaun Citilink. Imajen/Citilink

DILI, 01 maiu 2021 (TATOLI)—Autoridade Indonézia la autoriza pasajeiru 44, ne’ebé sai hosi Dili ho Aviaun Citilink, tuun iha Kupang, Indonézia.

“Ohin, traballadór hosi kompañia Wika na’in-44 atu fila ba sira-nia rai maibé la konsege tanba Governu Indonezia aplika regulamentu foun ne’ebé mak provizoriamente sira la simu sidadaun estrajeiru no Indonézia rasik,” Diretór Aviaun Sriwijaya iha Timor-Leste, Fernado da Silva, hateten ba Agência TATOLI, Aeroportu Internasionál Prezidente Nicolau Lobato, Comoro, Dili, sábadu ne’e.

Tuir esplikasaun autoridade, aplikasaun regulamentu foun iha Indonézia atu evita númeru moras COVID-19 aumenta iha Indonézia.

 “Sira la simu sira-nia sidadaun rasik atu fila tanba sira atu evita númeru kazu COVID-19 hanesan iha Índia no tanba daudaun Indonezia iha tempu Lebaran,” nia akresenta.

Maski nune’e, ajénsia Citilink sei responsabiliza hodi devolve pasajeiru nia osan billete

“Klaru sidadaun ida kuandu sosa billete no viajen kanseladu tanba problema iha desizaun ruma hosi sira-nia nasaun, sira tenke hetan sira-nia direitu filafali, tanba ne’e ema-nia desizaun ita labele interven,” nia hatutan.

Enkuantu, pasajeiru 35 ne’ebé hanesan traballadór kompañia WIKA, ho Aviaun Citilink to’o iha Aeroportu Comoro, iha loron hanesan, hodi serbisu iha área infraestrutura.

“Pasajeiru 35 ne’ebé mai ohin hanesan traballadór hosi kompañia Wika ne’ebé serbisu iha área eletrisidade no konstrusaun balun iha Dili, sira mai atu troka na’in-44 ne’ebé maka kontratu ramata ona no atu fila, maibé tanba desizaun hosi Governu Indonezia la autoriza tama Indonézia, nu’udar ajénsia aviasaun labele halo buat ida,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here