Eis Ministru Negósiu Estranjeiru no Kooperasaun (MNEK), Zacarias Albano da Costa. Imajen/Mídia PR.

DILI, 30 abríl 2021 (TATOLI)—Eis Ministru Negósiu Estranjeiru no Kooperasaun (MNEK), Zacarias Albano da Costa, ohin hasoru malu ho Prezidente Repúblika Francisco Guterres Lú Olo hodi hato’o agredesimentu ba konfiansa ne’ebé Estadu Timorense fó ba nia nu’udar kandidatu Nasionál ba Sekretáriu Ezekutivu CPLP

Notísia Relevante: Governu Propoin Zacarias Albano ba Sekretáriu Ezekutivu CPLP

“Ohin, ha’u mai hasoru Prezidente Repúblika Francisco Guterres Lú Olo katak ha’u nu’udar kandidatu Nasionál ba Sekretáriu Ezekutivu Comunidade Países da Língua Portuguesa,” Zacarias Albano da Costa informa ba jornalista sira, iha Palásiu Prezidénsia Nicolau Lobato, Bairru Pite, Dili sesta ne’e.

Bazeia ba kontestu ida-ne’e mak nia parte hasoru malu ho Prezidente Repúblika hodi hato’o agradesimentu ba apoiu no konfiansa ne’ebé Estadu Timorense fó ba nia ba kargu Sekretáriu Ezekutivu CPLP ba tinan 2021-2023, posivelmente aumenta tinan rua tan hosi 2023-2025.

Tanba, CPLP ne’e sai organizasaun ida-ne’ebé Timor-Leste sai mós hanesan fundadór ne’ebé mak partisipa antes maibé la’ós agora de’it, no organizasun ida-ne’ebé dahuluk liu tinan 25 atu hahú mós ho Sekretáriu Ezekutivu ida.

“Tanba ne’e, ha’u onra tebes-tebes, previléjiu atu serví Timor-Leste nu’udar Sekretáriu Ezekutivu CPLP nian. Naturálmente, ohin, ha’u aprezenta mós problema ne’ebé CPLP enfrenta no aumezmu tempu ne’e oinsá mak rezolve problema hirak ne’e bainhira ha’u asume ha’u-nia mandatu iha Lisboa hahú fulan jullu,” nia dehan.

Ho enkontru ne’e, nia dehan, Prezidente Repúblika hanesan ema ida-ne’ebé sempre empeñadu iha asuntu CPLP nian, ne’ebé nia rasik mak xefia no prepara Prezidénsia Timorense ba CPLP iha tinan 2014.

“Cimeira CPLP sei realiza iha Ángola maibé Ángola dehan katak sira hakarak Cimeira Prezidensiál. Purtantu, ha’u hanoin konvite seidauk to’o iha Timor-Leste maibé importante mak data ne’e ofisiál ona katak Cimeira sei hala’o iha 17 jullu 2021 iha Luanda Ángola,” Zacarias Albano da Costa informa.

Ba asuntu ida-ne’e, nia parte mós sei haruka tékniku hodi partisipa reuniaun preparatória hahú hosi 12 jullu no tempu hanesan konfirma nia hanesan futuru Sekretáriu Ezekutivu CPLP nian no posivelmente toma pose hala’o iha Luanda ka iha Lisboa ne’e nia seidauk hatene.

Tinan ne’e, nia dehan, CPLP sei selebra tinan 25 hanesan momentu ke istóriku tebes ne’ebé Timor mós partisipa mezmu ke seidauk sai nu’udar Estadu Independente, maibé nia rasik partisipa hodi troka Ramos Horta, Mari Alkatiri, João carrascalão, no José Luís Guterres ne’ebé partisipa iha Cimeira konstituitiva CPLP nian ne’ebé tinan 25 liubá hala’o iha Sentru Kulturál ema-nian iha Lisboa.

Jornalista: Osória Marques

Editór: Cancio Ximenes

PUBLISIDADEiklan

1 KOMENTÁRIU

  1. Parabens senhor DR. Zacsrias Albano da Costa nb hetan fiar hs Estadu Timor Leste ba asumi kargu hanesan Secretario Executivo CPLP periodo 2021-2023, parabens e bom trabalho iha futuru

HAKEREK NO HATÁN

Please enter your comment!
Please enter your name here