Membru PNTL hala’o patrullamentu hodi asegura situasaun serka sanitária iha Dili, sesta (12/03/21). Imajen Tatoli/António Gonçalves.

DILI, 30 abríl 2021 (TATOLI)—Polísia Nasionál Timor-Leste (PNTL) liu hosi sesaun kriminál, rejista kazu krime hamutuk 51, iha teritóriu tomak, hahú hosi 23 to’o 29 abríl. Hosi kazu krime hirak-ne’e, na’in haat mak mate.

Kazu krime rejistadu, kompostu hosi kazu omesídiu ida, violénsia doméstika 13, agresaun fízika entre joven 10, tara an tolu, tama ilegál iha fronteira terrestre ida no kazu asidente trafégu kamán hamutuk 14.

Notísia relevante:Konfrontu iha Becora, karreta PNTL rahun no detein ema na’in-14

Portavós Komandu Jerál PNTL, Superintendente Xefe, Arnaldo de Araújo, fó-sai dadus ne’ebé PNTL rekolla, katak, iha inan-feton ida ho naran Lívia Belo Freitas (26), mate tanba tara an iha aldeia Bosilai, suku Makalaku, postu administrativu Quelicai, Munisípiu Baucau.

“Rezultadu investigasaun ne’ebé PNTL Baucau rekolla katak, vítima mate tara an tanba sofre moras mentál,” Arnaldo de Araújo hateten liu hosi konferénsia imprensa iha Caicoli, sesta ne’e.

Alende ne’e, iha 23 abríl tuku 22:00 otl, PNTL rejista mós kazu vítima Julieta Cristina Ximenes (25), mate tara an iha aldeia Wasufa, suku Alawa Kraik, postu administrativu Baquia Munisípiu Baucau, tanba problema partikulár.

Iha 24 abríl, tuku 10:00-17:00 otl, PNTL Baucau ho ekipa Sentru Integradu Jestaun Krize (SIJK) Munisípiu  Baucau, ba halo mós teste konfirmasaun ba mate-isin Indianu ida ho naran, Ahmid Jamil, ne’ebé mate derrepenente bainhira konsumu tua iha nia serbisu fatin, aldeia Kairiri, suku Gariuai, Baucau vila, ne’ebé serbisu iha Kompañia ICT-ICP nu’udár Konsultór ba projetu estrada Baucau-Viqueque.

Entretantu, iha Munisípiu Ermera, PNTL rejista kazu vítima Graciano Soares (26) hosi aldeia Riamori, suku Railaco, Ermera, mate tara an iha tuku 17:30, no parte PNTL sei kontinua halo prosesu investigasaun.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here