Mapa previzaun tempu hosi DNMG.

DILI, 30 abríl 2021 (TATOLI)—Previzaun tempu hosi Diresaun Nasionál Meteorolojia Jeofízika (DNMG-sígla portugés) Timor-Leste, ne’ebé Agência Tatoli asesu iha tuku 09:20 katak,  kondisaun atmosférika atuál  parsialmente instável ka maioria kalohan taka kuaze iha territóriu, no kalohan ne’e posibilidade bele kauza udan fraku ba moderadu iha kualkér momentu.

Tuir observasaun hosi satélite meteorolójiku Himawari-8, temperatura do ar varia hosi 18-25 C iha rejiaun montaña no 24-29 C iha rejiaun kosteira.

Notísia relevante:Inundasaun estraga natar 1.900 inklui irrigasaun boot ida

“Anin hu’u ho velosidade fraku iha territóriu Timor laran tomak ho nia diresaun variável no akompaña ho rajada anin iha nia intensidade forte bele sustenta to’o 42 km/oras liuliu iha parte foho RAEOA nian,’’ DNMG haktuir kona-bá previzaun tempu ohin-nian.

Kona-bá kondisaun laloran iha kosta norte, laloran a’as vária hosi 0.3-0.8 metru (normál), iha kosta súl, laloran a’as vária hosi 0.5-1.5 metru (normál-moderadu).

Previzaun Tempu ba kondisaun atmósfera iha parte lorokraik, kontinua instável ka maioria kalohan sei taka no posibilidade kauza udan ho intensidade fraku ba moderadu iha Timor laran, prinsipalmente iha parte foho sira.

Anin kontinua hu’u ho velosidade hosi  fraku ba moderadu iha territóriu, akompaña ho rajada anin ho nia intensidade forte bele sustenta to’o 45 km/oras liu-liu iha Munisípiu-sira hanesan Dili, Aileu, Covalima, Bobonaro no RAEOA.

Eventuál ida-ne’e akontese tanba hetan influensia hosi sistema baixa presaun ka Low pressure ne’ebé mak persiste iha illa Timor.

Husu ba viajante-sira ne’ebé dezloka ba munisípiu-sira hodi hala’o atividade ruma, atu tau atensaun nafatin  ba eventu ne’e.

Husu mós atu kontinua hado’ok an hosi fatin risku, hanesan ai-hun bo’ot, liña eletrisidade, mota no seluk-tan, hodi evita dezastre ne’ebé ita la espera.

Husu ba komunidade iha territóriu atu akompaña nafatin  informasaun ba kondisaun tempu no klíma hosi fonte ne’ebé konfiável no kredível liu-liu instituisaun ka autoridade ne’ebé serbisu iha ramu Redusaun Risku Dezastre.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here