Osan Dolar Amerikanu. Imajen/Espesiál

DILI, 30 abríl 2021 (TATOLI)-Munisípiu tolu; Viqueque, Baucau no Aileu, nia ezekusaun orsamentu tinan fiskál 2021 nian iha Quarter Primeiru (Q1)  foku ba kategoria saláriu vensimentu, transferénsia públika no bens servisu.

Diretór Finansas Administrasaun Munisípiu Viqueque, Vasco Nunes hateten, Orsamentu Jerál Estadu (OJE) 2021 ba Munisípiu Viqueque ho montante $4.506.514 nia ezekusaun foin atinje 11.75%.

Notísia Relevante : OJE 2021, Munisípiu Manatuto foin ezekuta ba kategoria lima

“Foin daudaun OJE 2021 ne’ebé aloka mai Munisípiu Viqueque  hamutuk $4.506.514 no ba Quarter Primeiru (Q1) nian gastu ona $529.539,25 ho nia persentajen 11.75%, ba  saláriu vensimentu (16.05%), transferénsia públika (15.96%) no bens servisu (0.53%),” Vasco Nunes  hateten ba Agência Tatoli liuhosi telefónika, sesta ne’e.

Kona-ba kapitál menór, nia dehan, orsamentu hamutuk $110.100.000, maibé daudaun ne’e seidauk ezekuta tanba foin halo hela kompromisu tanba diresaun aprovizionamentu sei halo hela prosesu.

Enkuantu ba kapitál dezenvolvimentu nia orsamentu alokasaun ne’e hamutuk $501.466, maibé seidauk ezekuta nafatin tanba halo hela kompromisu  no diresaun aprovizionamentu.

Munisípiu Baucau foin atinje 21.6%

Hosi sorin seluk, prezidente Autoridade Munisípiu Baucau, Olívio Freitas “Bou Lesa” informa, Ezekusaun OJE 2021 ba Munisípiu Baucau montante $5.700.231 foin atinje 21.6%.

“Ami foin ezekuta 21.6%, ba saláriu vensimentu, transferénsia públiku no bens servisu,” Olívio Freitas hateten liuhosi telefónika.

Nia hatutan, ezekusaun OJE 2021 ba Q1 nian Munisípiu Baucau seidauk ezekuta ba kapitál minor no dezenvolvimentu razaun tanba situasaun COVID-19 ne’ebé aplika Estadu Emerjénsia no serka sanitária no kalamidade.

Munisípiu Aileu foin ezekuta 20%

Hosi sorin seluk, Administradór Munisípiu Aileu, Abel da Conceição, informa, ezekusaun Orsamentu Jerál Estadu (OJE) 2021 aloka ba Munisípiu Aileu hamutuk $3,3 foin atinje 20%.

“Ita Aileu OJE 2021 ne’ebé haruka mai ne’e hamutuk $3,3 ne’ebé ninia ezekusaun ne’e ami foin atinje 20%, ida ne’e ba saláriu vensimentu, transferénsia públika no bens servisu,” Abel da Conceição hateten liuhosi telefónika.

Kapitál menór daudaun ne’e sosa komputadór no motór, nune’e  aprovizionamentu munisipál halo hela prosesu aprovizionamentu atu bele ezekuta kapitál menór.

Kona-ba kapitál dezenvolvimentu, nia haktuir, tinan ne’e sira projetu hitu ne’ebé atu ezekuta mak hanesan, konstrusaun ba edifísiu Postu Administrativu Aileu Vila, edifísiu Postu Administrativu Lequidoe, konstrusaun Sentru Saúde ida iha Aileu Vila, halo bronjong ba mota tolu, no mós fura bee ba projetu komunitáriu iha Suku Seloi-Craic.

“Tékniku munisípiu nian hamutuk ho Ajénsia Dezenvolvimentu Nasionál (ADN) finaliza hela dezeñu ne’ebé ita hein de’it hotu ita ezekuta, tanba orsamentu ba kapitál dezenvolvimentu ne’e hamutuk $55.000,” nia hateten.

Jornalista   : Arminda Fonseca 

Editór        : Francisco Simões

HAKEREK NO HATÁN

Please enter your comment!
Please enter your name here