Primeiru-Ministru, Taur Matan Ruak. Imajen TATOLI/Egas Cristóvão

DILI, 30 abríl 2021 (TATOLI)—Primeiru-Ministru, Taur Matan Ruak, hateten Governu kompromete ba Prezidente Repúblika, Francisco Guterres Lú Olo, atu kontinua esforsu hodi minimiza COVID-19 iha Timor-Leste.

“Governu kompremete ba Prezidente Repúblika katak ita kontinua esforsu para ke COVID-19 ne’e minimiza risku ba ita-nia populasaun sira. Ho ne’e, ha’u husu mós komunidade fó mós sira-nia kontribuisaun hodi prevene COVID-19 ne’e iha Timor-Leste,” Taur Matan Ruak hateten ba jornalista sira hafaoin hala’o enkontru semanál ho Prezidente Repúblika, iha Palásiu Prezidénsia Nicolau Lobato, Bairru Pite, Dili, sesta ne’e.

Xefe Governu ne’e hateten, to’o horisehik (kinta, 29/04) Governu implementa serka sanitária ba munisípiu kuaze sanulu, menus mak Munisípiu Aileu, Manatuto no Rejiaun Administrativa Espesiál Óe-Cusse Ambeno (RAEOA).

Ida-ne’e hatudu katak evolusaun makaas liu ka númeru evolusaun afetadu COVID-19 makaas liu tanba atu besik 2000-resin no 1000-resin mak sei ativu inklui ida-ne’ebé mate ho COVID-19 ne’e na’in tolu (3) ona.

Kona-ba hapara transporte públiku, Xefe Governu hateten atu diminui konsentrasaun sira tanba Dili ne’e sai episentru no sai fatin ida ne’ebé lori moras COVID-19 ba iha fatin seluk-seluk, entaun COVID-19 ne’e iha ona nível kontajen komunitária. Ida-ne’e sai situasaun ne’ebé preokupa tebes.

“Tanba ne’e, klaru ke Governu haree halo oinsá mak kontinua fleksibiliza tanba ita mós iha momentu ne’ebé difísil liuliu família sira oinsá rekupera hosi dezastre naturál ne’e no ita mós kontinua fó ita-nia kontribuisaun ba kombate COVID-19. Dalan úniku mak la’o tuir protokolu Ministériu Saúde (MS) no Organizasaun Mundiál Saúde (OMS) nian,” PM hateten.

Aleinde ida-ne’e, Xefe Governu mós hateten kestaun seluk kona-ba afetadu COVID-19 iha konfinamentu domisiliáriu ne’e ba Prezidente Repúblika no Prezidente Repúblika nia ejizénsia mak desizaun halo konfinamentu ne’e di’ak no kapaas maibé kapaas liu bainhira polísia implementa medida sira-ne’e.

“Entaun, ha’u hanesan Primeiru-Ministru no mós Ministru Interiór (MI), fó instrusaun ba Vise-Ministru Interiór para kontinua halo diskusaun ho sala situasaun ho Polísia Nasionál Timor-Leste (PNTL) no implementa para reforsa iha sidadaun nia-leet no iha fatin-fatin ne’ebé sei serka sanitária hela,” PM Taur hateten.

Ho situasaun hirak ne’e, ohin, Xefe Governu informa ba Prezidente Repúblika no Xefe Estadu kontinua husu ba Governu para tau-matan ba sidadaun sira no  mós oinsá mak kontrola ba evolusaun COVID-19 iha Timor-Leste.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here