Imajen/Media PR.

DILI, 30 abríl 2021 (TATOLI)—Ezekusaun Orsamentu Jerál Estadu (OJE) 2021 hosi Parlamentu Nasionál iha trimestre dahuluk ho persentajen ezekusaun atinje 31,1%.

“Persentajen ezekusaun atinje ona 31,1%. Ne’e ba sálariu no vensimentu, bens servisu no transferénsia públiku, kona-ba kapitál dezenvolvimentu seidauk halo buat ida tanba verba kapitál dezenvolvimentu mudansa uitoan iha Orsamentu Retifikativu,” Sekretáriu Jerál Parlamentu Nasionál Adelino Afonso de Jesus, informa ba jornalista sira, iha uma fukun, sesta ne’e.

Orsamentu privativu Parlamentu Nasionál  ho montante $16,984,066 aprovadu iha loron 29 setembru 2020 liubá ho rezultadu votasaun a-favór 39 no abstensaun 19.

Hosi orsamentu $16, 984, 066 ne’e koloka ba saláriu no vensimentu $5,581,083, bens no servisu $6, 250,029, kapitál minór $492,796, kapitál dezenvolvimentu $3,000.000 (sofre altersaun iha orsamentu retifikativu millaun $2,5 no hela de’it rihun $500) no transferénsia públika $1,462,000.

Tuir portál transparénsia Ministériu Finansa nian, relata ezekusaun PN nian atinje ona 31,1% hosi montante orsamentu orijinál $16,984,066 ho ninia kompromisu $693,572.53, obrigasaun $1,451,919.45, atuál $3,834,742.50 no hela saldu  $11,003,831.52.

Nia esplika, verba ba saláriu no vensimentu garante saláriu ba funsionáriu parlamentu nian, transferénsia públika fó subvensaun ba partidu sira-ne’ebé hetan asesun parlamentár.

“Bens no servisu dezagregasaun boot tebes, purtantu ha’u labele dehan, ba sosa sasán no nesesidade bázika funsionamentu Parlamentu Nasionál nian,” nia katak.

Purtantu orsamentu privativu Parlamentu Nasionál  ho montante $16,984,066 aprovadu iha loron 29 setembru liubá ho rezultadu votasaun a-favór 39 no abstensaun 19.

Nune’e mós bens (sasán) no servisu $6.250.029 prevee ba viajen lokál, viajen estranjeiru, formasaun profisionál no semináriu, emcargos com instalações, arrendamentu ba propriedade, kombustível ba operasaun veíkulu, manutensaun veíkulu, seguros, rendas e serviços, materiál no fornesimentu operasionál, kombustível ba jeradór, manutensaun ba ekipamentu no edifísiu, serbisu operasionál, asisténsia téknika, servisu tradusaun, servisu diversu sira seluk, pagamentu kuota no servisu catering.

Hosi parte kapitál minór prevee ba kompra veíkulu, ekipamentu informátika, ekipamentu seguransa, ekipamentu ba komunikasaun parlamentu nian, ekipamentu diversu sira seluk, mobiliáriu, ekipamentu sira seluk kona-ba eskritóriu no ekipamentu água.

Hosi parte kapitál dezenvolvimentu prevee ba infraestrutura ativu sira, servisu no akipamentu menores no kategoria transferénsia sei hala’o pagamentu ba pesoál sira no konsesaun públika.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here