Motorista na’in 100-resin, ne’ebé hala’o asaun pasífika iha área Palásiu Governu, sesta (30/04/21). Imajen Tatoli/António Gonçalves.

DILI, 30 abríl 2021 (TATOLI)—Polísia Nasionál Timor Leste (PNTL) Munisípiu Dili, haruka-fila motorista mikrolete 04, 09, 10, 11, na’in 100-resin, ne’ebé halo asaun pasífika iha área Palásiu Governu, tanba konsidera asaun ne’e ilegál no laiha koñesimentu hosi polísia.

Segundu Komandante Polísia Munisípiu Dili, Superintendente Euclides Belo, ne’ebé intervein direta hodi haruka motorista hirak-ne’e fila ba idaidak-nia uma, hateten, asaun ne’e ilegál no laiha koñesimentu hosi polísia, liuliu Timor Leste oras ne’e daudaun aplika hela Estadu Emerjénsia.

Notísia relevante:PNTL blokeia movimentu transporte públiku iha Dili

“Husu ba motorista-sira atu fila hodi kumpre órden Estadu. Labele halo asaun iha fatin ne’e, tanba ita implementa hela Estadu Emerjénsia ne’ebé la autoriza atu halo asaun,” Euclides Belo haruka motorista-sira fila.

Iha fatin hanesan, motorista, Angelito Soares, hateten asaun ne’ebé sira halo hakarak ezije Governu atu fó flexibilidade ba hodi buka moris iha Dili, tanba sira osan laiha no enfrenta daudaun hamlaha.

“Serka Sanitária ida-ne’e afeta tebes ba ami-nia nesesidade bázika hanesan, hahán ba ami-nia oan no família, bainhira ami la halai karreta, ami atu hetan osan hosi ne’ebé,” Angelito hateten.

Alende ne’e, motorista, Agostinho Gomes husu Governu atu bele fó apoiu ai-han durante Serka Sanitária, tanba durante ne’e nia sustenta moris ho halai karreta.

Entretantu, alterasaun projetu rezolusaun Governu ba impozisaun konfinamentu domisiliáriu jerál iha munisípiu Dili, hahú tuku 00:00 loron 30 abríl 2021, to’o tuku 23:59 loron 13 maiu 2021.

Rezolusaun Governu ne’e, bandu mós populasaun no transporte públiku labele halo movimentu iha Dili no sai ba munisípiu seluk, eseptu iha kazu sira ho fundamentu forte tanba seguransa públika, saúde públika, asisténsia umanitária, manutensaun hosi sistema abastesimentu públiku, ka razaun seluk ne’ebé presiza hala’o ba interese públiku.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here