Inundasaun iha Ponte Comoro 3, domingu (04/04). Imajen TATOLI/António Gonçalves

DILI, 29 abríl 2021 (TATOLI)–Ministru Administrasaun Estatál (MAE), Miguel Pereira de Carvalho, halo aprezentasaun iha reuniaun Konsellu Ministru (KM), kona-ba impaktu hosi dezastre naturál ne’ebé akontese iha domingu (04/04) no asaun ba rekuperasaun.

Ministru Miguel Pereira halo aprezentasaun hanesan Koordenadór Unidade Misaun ba Protesaun Sivíl no ba Jestaun Dezastre Naturál.

“Iha aprezentasaun, Ministru Administrasuan Estatál hato’o katak daudaun ne’e iha ema hamutuk 4.356 mak desloka ba sentru akollimentu hitu ne’ebé sei ativu, enkuantu iha nível nasionál, inundasaun ne’e afeta ona família 31.337 no ema na’in-41 mak lakon vida,” Ministru Prezidénsia Konsellu Ministru, Fidelis Manuel Leite Magalhães relata hafoin reuniaun KM, iha Palásiu Governu, kinta ne’e.

Nune’e, totál abitasaun 21.178 iha país tomak ne’ebé mak estraga no ba infraestrutura públika ne’ebé estragu kompostu hosi estrada hamutuk 22 no ponte 11.

“Governu fó hela apoiu ba família afetada ho produtu alimetár no la’ós alimentár, inklui halo hela planu atu distribui matéria sira ba rekonstrusaun abitasaun sira ne’ebé mak estraga,” Portavós Governu  akresenta.

Aleinde ne’e, analiza mós opsaun realojamentu ba populasaun ne’ebé maka hela iha área proibida no área foho lolon sira ho perigozidade média to’o a’as.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here