Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves.

DILI, 29 abríl 2021 (TATOLI)–Governu liuhosi reuniaun Konsellu Ministru (KM) halo renovasaun Estadu Situasaun Kalamidade, hodi hasoru situasaun dezastre naturál ne’ebé akontese foin lalais.

“Konsellu Ministru aprova ona Projetu Rezolusaun Governu, ba renovasaun deklarasaun Estadu kalamidade ba loron 30 tan, hodi hasoru  inundasaun iha munisípiu Dili inklui munisípiu seluk, iha madrugada loron 04 abríl 2021, ne’ebé provoka hosi Siklone Tropikál Seroja,” Ministru Prezidénsia Konsellu Ministru Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kinta ne’e.

Notísia relevante: Timor-Leste deklara Estadu situasaun kalamidade nível nasionál durante loron 30

Portavós Governu dehan, dezastre naturál foin lalais ne’e hamosu estragu barak iha Dili inklui munisípiu sira.

Tuir dadus, vítima afetadu inundasaun hosi munisípiu 12 inklui Rejiaun Administrativu Espesiál Oé-cusse Ambeno (RAEOA) hamutuk 21.889.

Daudaun ne’e, sentru akollimentu iha Dili hamutuk 31 ho totál uma-kain ne’ebé destakadu hamutuk 15.876.

Iha 16 abríl, refujiadu balun ne’ebé hela iha sentru akollimentu hahú fila ona ba sira-nia uma no hirak ne’ebé sei hela iha sentru akollimentu hamutuk 7.246.

Aleinde ne’e, dezastre naturál ne’e rezulta ona sidadaun na’in-42 lakon vida, kompostu hosi na’in-22 iha Dili, 10 iha Ainaro, lima iha Manatuto, na’in-tolu iha Viqueque no na’in-rua iha Aileu.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here