Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 29 abríl 2021 (TATOLI)—Parlamentu Nasionál (PN) no Ministériu Interior (MI) diskute projetu-lei númeru 25/V/(3a) kona-ba alterasaun dahuluk lei migrasaun no azilu.

Projetu-lei númeru 25/V/(3a), prosede ba alterasaun dahuluk Lei númeru 11/2017, 24 maiu kona-ba Lei Migrasaun no Azilu, aprovadu iha faze jeneralidade ho rezultadu votasaun a-favór 48 no abstensaun 5 iha loron 27 abríl foin lalais ne’e no oras ne’e tama ona diskusaun faze espesialidade.

Prezidente Komisaun B ne’ebé trata asuntu Negósiu Estranjeiru, Defeza no Seguransa, Deputadu José Agostinho Siqueira ‘Somotxo’, esplika inisiativa ba projetu-lei ne’e mai hosi deputadu sira hosi komisaun refere.

“Primeira-alterasaun ba lei migrasaun no azilu no ho artigu ida de’it ho objetivu fó valór ba konkordata ne’ebé Governu Timor-Leste asina ho Santá Sé kona-ba vistu permanénsia. Tanba iha konkorda iha artigu 21 ne’ebé ko’alia kona-ba vistu ba tempu naruk maibé to’o ohin loron ita seidauk tau iha prátika kona-ba vistu tempu naruk ba misionáriu katólika estranjeiru sira,” nia esplika ba jornalista sira, iha resintu Parlamentu Nasionál, kinta ne’e.

Nia fundamenta, iha projetu-lei ne’e propoin altera artigu 13, 41, 59, no 127 hosi Lei númeru 11/2017, 24 maiu kona-ba Lei Migrasaun no Azilu.

Tanba durante ne’e misionáriu katólika sira sei tuir nafatin vistu normál ho tipu A ho vistu tinan rua (2) no tipu B ho vistu tinan lima (5) maibé misionáriu sira kumpre de’it vistu ba tinan rua (2) nian.

Iha debate espesialidade ne’e, nia dehan, deputadu sira aprova ona artigu 13, hela artigu 41, 59 no 127.

Tuir dokumentu ne’ebé Agência TATOLI asesu iha Parlamentu Nasionál, katak artigu 13 ne’e defende konkorda entre Timor-Leste ho Santa Sé, artigu 41 ko’alia kona-ba autorizasaun rezidénsia ba sidadaun estrangeiru iha fixasaun rezidénsia.

Nune’e mós artigu 59 foka kona-ba autorizasaun rezidénsia ho tipu temporária no permanente, no artigu 127 ko’alia kona-ba izensaun ba impostu no taxa alfandegária no tributária.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here