DILI, 29 abríl 2021 (TATOLI)—Ministériu Obra Públika (MOP) hamutuk ho Ajénsia Japaun ba Kooperasaun Internasionál (JICA, sigla inglés) halo ona diskusaun no elaborasaun ideia hodi fó asisténsia téknika ba rekonstrusaun sira iha Timor-Leste.
“Ita elabora ona idea ho JICA atubele fó asisténsia téknika halo planifikasaun hodi mellora infraestrutura, liuliu halo jestaun ba ita-nia ribeira sira no bele harii mós barreira retensaun no segimentasaun iha mota ulun sira,” Ministru Obra Públika, Salvador Eugênio Soares dos Reis Pires, iha Palásiu Governu, kinta ne’e.
Iha enkontru ne’e, Ministru aprezenta oinsá apoiu Governu Japaun liuhosi ajénsia JICA ba rekonstrusaun no reabilitasaun estragu hanesan estrada, ponte, no moru protesaun sira, inklui sistema kanalizasaun bee-moos ne’ebé hetan estragu maka’as iha kalamidade 04 abríl 2021.
Tuir Ministru, konstrusaun infraestrutura ne’e presiza lori tempu tanba sei liuhosi estudu detalladu no haree mós risku sira hafoin halo konstrusaun ba obra.
Hafoin observa estragu infraestrutura kauza dezastre naturál, Ministru Salvador fó oportunidade atu mellora planifikasaun infraestutura.
“Nune’e labele abitua ona ko’alia hanoin ohin no halo kedan. Ita hanoin atu rezolve de’it hodi halo ohin, sein metiga risku sira hanesan mudansa klimátika ka dezastrea naturál no aposta mai ita mak ita hasoru problema nafatin,” nia hatutan.
Tuir governante ne’e, ema hotu la espera udan mai boot hodi hamosu inundasaun, maibé infraestutura ezistente labele akomoda ho forsa natureza.
Jornalista: Florêncio Miranda Ximenes
Editora: Julia Chatarina
