Médiku-sira prepara hela ekipamentu hodi halo teste swab iha CCD, Tersa (27/04/21). Imajen Tatoli/António Gonçalves.

DILI, 29 abríl 2021 (TATOLI)—Oras ne’e daudaun autoridade saúde Munisípiu Lautém, izola sidadaun na’in-ualu iha sala izolamentu no mós na’in 100-resin mak kumpre kuarentena obrigatóriu iha Munisípiu ne’e, hafoin hetan autorizasaun hosi Sentru Integradu Jestaun Krize (SIJK) hodi sai hosi serka sanitária iha Dili.

“Totál ema ne’ebé iha kuarentena na’in 100-resin. Ita iha kazu konfirmadu na’in 11, maibé na’in-tolu rekoperadu ona hela na’in-ulau iha izolamentu ne’ebé lokaliza iha fatin veteranu sira-nian,’’ Diretór Serbisu Saúde Munisípiu Lautém, Bernardo Amaral Lopes, hateten ba Agência Tatoli via telefónika, kinta ne’e.

Notísia relevante:COVID-19: pozitivu 66, rekoperadu 47 no ativu 1.123

Parte Serbisu Saúde Munisípiu Lautém iha ona planu atu informa ba Lautém-oan ne’ebé hakarak tama iha Munisípiu ne’e, husu atu mai fazeadamente tanba haree ba espasu fatin ne’ebé limitadu no númeru pozitivu ne’ebé kontinua aumenta.

Oras ne’e daudaun, autoridade saúde utiliza hela komunidade balun-nia uma, uza mós Polo UNTL no uma privada haat mak sai kuarentena obrigatóriu.

Iha Munisípiu ne’e, aplika ona sistema ida katak, sidadaun bele tama livre maibé tenke hetan karta autorizasaun hosi SIJK, anexa ho rezultadu teste negativu COVID-19, ho durasaun labele liu loron tolu.

Autoridade aplika sistema ida-ne’e, tanba kazu dahuluk mosu iha Munisípiu ne’e hosi  estudante-sira ne’ebé hetan karta autorizsaaun hosi SIJK no submete ba teste swab, ikus-mai rezultadu pozitivu COVID-19.

Kazu daruak iha semana kotuk, detetadu tanba sidadaun ne’e teste ona iha Dili ho rezultadu negativu, maibé  tanba nia durasaun liu ona loron tolu, nune’e obrigadu tenke hatama ba kuarentena ne’ebé teste tuir-mai rezultadu pozitivu.

“Ida-ne’e mak ami foti desizaun katak, maski iha teste negativu hosi Dili, maibé nia durasaun labele liu loron tolu. Bainhira liu loron tolu iha alternativu rua atu fila ba fatin anteriór no tama iha Munisípiu tenki kuarentena  obrigatóriu,’’ nia esplika.

Dadus jerál ohin-nian, SIJK rejista kazu pozitivu COVID-19 hamutuk 66, rekoperadu 47 no totál kazu ativu 1.123.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here