Komunidade no estudante hala’o hela teste swab iha CCD, tersa (27/04/21). Imajen Tatoli/António Gonçalves.

DILI, 29 abríl 2021 (TATOLI)—Xefe Bankada União Democrática Timorense (UDT), Deputadu Francisco David Xavier Carlos, hateten atu halo prevensaun no kombate surtu COVID-19 iha Timor-Leste dalan ida mak komunidade hotu-hotu tenke kumpre regra no familiár uza maskára, distansiamentu sosiál no fase-liman beibeik ho sabaun.

Xefe Bankada UDT/FM, Francisco Xavier Carlos, Imajen/ Egas Cristóvão

“Tuir ha’u-nia opiniaun pesoál, serka sanitária ne’e lalika halo. Ita husik povu ne’e livre maibé hosi parte Ministériu Saúde mak tenke sensibiliza regra sira ba ita-nia populasaun kona-ba uza maskára, mantein distansiamentu sosiál no fase-liman beibeik ho sabaun, komunidade bele familár ho regra hirak ne’e,” nia informa ba jornalista sira, iha resintu Parlamentu Nasionál, kinta ne’e.

Xefe Bankada UDT ne’e observa katak durante serka sanitaria no kalamidade dezastre naturál ne’ebé akontese iha loron 4 abríl halo komunidade dezorganizadu maske iha hela vijénsia estadu emerjénsia.

“Ita haree ema-ne’ebé afetadu iha COVID-19 sa’e makaas iha serku sanitaria ne’e no ita haree povu hasoru difikuldade barak no roda ekonomia iha rai laran mós iha resesaun makaas. Bankada UDT nia haree katak di’akliu mak ita mantein nafatin distansiamentu sosiál, uza maskára no fase-liman beibeik ho sabaun, se posível uza mós luvas. Ho buat sira-ne’e, ita bele prevene,” nia dehan.

Xefe Bankada UDT konsidera aplikasaun serka sanitária no konfinamentu domisiliária jerál, laiha sentidu tanba ne’e mak halo númeru pozitivu sa’e makaas.

“Ha’u hela besik loos iha Sentru Intergradu ba Jestaun Krize (CCIG-sigla portugés), ha’u haree kuaze laiha distansiamentu sosiál kona-ba ema-ne’ebé ba hasai karta autorizasaun hodi sai ba munisípiu, diferensa iha-ne’ebé. Buat sira hanesan ne’e mak halo ema lakon konfiansa kona-ba COVID-19 ne’e,” nia dehan.

Maibé, nia hatutan, COVID-19 iha Timor-Leste eziste duni tanba kada loron númeru pozitivu COVID-19 kontinua aumenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here