Prezidente Repúblika, Francisco Guterres “Lú Olo’. Imajen Tatoli/Egas Cristovão.

DILI, 29 abríl 2021 (TATOLI)—Prezidente Repúblika, Francisco Guterres ‘Lú Olo’, hateten Tribunál Tribunal Rekursu nu’udar tribunal segunda instánsia, nune’e Tribunál Rekursu mak tesi no hakotu rekursu hosi primeira instánsia mai hosi Tribunal Distritál, no tribunál sira hakotu lia ho povu nia naran labele sai de’it konseitu demokrátiku abstratu.

Notísia Relevante: Prezidente Repúblika nomea Deolindo dos Santos nu’udar PTR

“Hakotu lia  ho Povu nia naran labele sai de’it konseitu demokrátiku abstratu.  Tenke hala’o duni. La’ós de’it  atu  tesi-lia kazu sira maibé implika mós katak julgamentu sira-ne’e tenke tuir dalan lei nian no sei reprezenta prosesu jerál tomak ida-ne’ebé sei asegura identidade Povu nian ho Tribunál sira,” Prezidente Repúblika, Francisco Guterres ’Lú Olo’, hateten hateten liuhosi ninia diskursu iha serimónia tomada de pose ba Prezidente Tribunál Rekursu, Deolindo dos Santos, iha Palásiu Prezidensiál Nicolau Lobato, Bairru Pite, Dili, kinta ne’e.

Ida-ne’e, Prezidente hateten implika katak dezisaun sira no mós rezultadu julgamentu tribunál sira-nian, tenke fó-sai ba publiku ho fundamentu iha dreitu no sein prejuízu ba segredu justisa nian tuir lei haruka. 

Purezemplu, nia dehan, akórdão sira hosi Tribunal Rekursu ho forsa obrigatória jerál tenke públika  sistematikamente iha Jornál Repúblika, Tribunal Distritál sira mós tenke permite asesu ba sidadaun sira, feto no mane, atu iha koñesimentu ka hatene mós sira-nia movimentu sira-ne’ebé iha karáter públiku.

Ida-ne’e implika katak Tribunál Judisiál sira mós sei halo sorumutu ho reprezentante suku no aldeia sira, atu haklaken sira-nia misaun no fó-hatene mós rezultadu ein-jerál kona-ba sira-nia atividade. Apela ba  ema hotu atu fó kontribuisaun no kolaborasaun atu fó apoiu ba kumprimentu sentensa, apoiu ba sira-nia rekuperasaun no bainhira simu hikas fali sira iha komunidade nia laran.

“Iha sistema foun ne’e,  ita tenke defende no hala’o duni valór nobre sira hanesan independénsia Tribunál sira-nian, demokrasia, kultura jurídika no kultura dame,” Prezidente Repúblika hateten.

Administrasaun Justisa nian tenke asegura  artikulasaun belar liu entre  instituisaun oin-oin, atu nune’e ita defende di’ak liutan órden jurídika no observánsia ba lei, bele fó garantia ba direitu no liberdade sidadaun sira-nian,  no asegura lala’ok justisa la’o lais liu no mós seguransa no órden públika sira.

Ho sistema Administrasaun justisa ne’ébe Timor-Leste hatuur ho prinsípiu governasaun nakloke no partisipativa, nia hateten, sei sai ferramenta fundamentál ba konsolida Estado de Direito Democrátrico liuhosi funsionamentu di’ak Tribunál dahuluk sira-nian iha nasaun ne’e, ne’ebé  kontribui daudaun no ba beibeik atu sidadaun hotu-hotu goza direitu tomak,  liberdade no garantia konstituionál sira.

Prezidente hateten, Parlamentu Nasional, Governu no Prezidente Repúblika tenke fó atensaun makaas liutan atu bele harii Supremu Tribunal de Justiça no hahú ninia knaar tuir Konstituisaun haruka.

“To’o ona tempu Estadu atu asume nu’udar prioridade atu aprova no ezekuta lejislasaun no programa ne’ebé tama ona ba knaar no funsaun Supremu Tribunál de Justiça ne’ebé sei sai nu’udar mós Órgaun Soberania ba ita-nia Estado de Direito Democrático. No,nu’udar institutisaun judisial indispensável ba harii sistema judisiária foun iha ita-nia País tuir Konstituisaun Repúblika haruka, bainhira  tama en-vigór,” nia dehan.

Xefe Estadu ne’e haktuir, liuhosi fó pose ba Juiz Deolindo dos Santos,  reafirma konfiansa ba Vossa Excelência atu kontinua  prezide  Tribunál Rekursu ba mandatu dala ida tan.

“Ha’u hein no dezeja katak Ita-Boot sei kontinua ita-nia misaun hodi ho dalan diakliu ita bele, ho koñesimentu no intelijénsia hatudu ona, ho forsa konviksaun nian, kompeténsia, dedikasaun no  espíritu misaun hatudu ona durante períodu mandatu dahuluk nu’udar Prezidente Tribunal Rekursu,” Lú Olo hateten.

Prezidente Repúblika iha konfiansa boot iha Juíz Deolindo dos Santos no mós iha koletivu Juíz sira iha Tribunal de Recurso. Juíz esperiente sira ho méritu rekoñesidu ona no hatudu liuhosi sira-nia lala’ok no progresaun durante sira-nia karreira.

Prezidente Repúblika, Orgauns  Estadu nian, no Povu en-jerál sei  akompaña beibeik  knaar hosi Prezidente Tribunal  Rekursu no mós hosi koletivu Juíz sira tomak ne’ebé halo parte bá,  ba oinsá sira hotu  hala’o sira-nia knaar  loro-loron atu haforsa  Justisa iha País ne’e.

“Ha’u pesoalmente, sei fó tempu nafatin no sei fó apoiu tomak ne’ebé presiza ba knaar hosi  Juiz Deolindo dos Santos ne’ebé ohin  hahú  hikas fali nu’udar Prezidente Tribunál Rekursu. Parabéns no votu ho laran ksolok atu hetan susesu boot liután durante Ita-Boot  ninia mandatu ida-tán, ba hala’o justisa lais liu no hakbesik liután ba sidadaun sira,” PR Lú Olo dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here