Enkontru Sekretáriu Estadu Kooperativa (SEKoop), Elizário Ferreira, ho Embaixadór Brazil iha Timor-Leste, Maurício Medeiros de Assis, iha edifísiu Akait, Dili, kinta (29/04). Imajen/SEKoop

DILI 29 abríl 2021 (TATOLI)—Sekretáriu Estadu Kooperativa (SEKoop), Elizário Ferreira, konvoka enkontru ho Embaixadór Brazil iha Timor-Leste, Maurício Medeiros de Assis, hodi ko’alia kona-ba kooperasaun iha área kooperativa.

“Área haat ne’ebé Brazil atu apoiu maka kooperativa multi-setorál, atu asegura merkadu ho relasaun integradu iha dezenvolvimentu kooperativa. Ida-ne’e sai hanesan programa prinsipál iha diskusaun no ba oin sei halo diskusaun téknika tanba sira aseita programa ne’ebé maka parte SEKoop aprezenta,” Sekretáriu Estadu Elizário, hateten iha ninia knaar fatin, Akait, Dili, kinta ne’e.

Programa haat ne’ebé governante ne’e aprezenta ba Embaixadór no ekipa mak hanesan kooperativa kréditu liuhosi hasa’e kapasitasaun dirijente kooperativa no nível operasionál sira, inklui halo jestaun atende membru sira ne’ebé iha kooperativa.

Seluk maka kooperativa agríkola, atu eduka populasaun sira hatene prodús produtu ida ho kualidade no sustentável.

Nune’e mós, kooperativa komérsiu atu lori produtór koñese merkadu, tanba bainhira povu prodús no laiha merkadu, sei la efetivu.

Ikus liu maka estudu komparativu, tanba Brazil ninia kooperativa dezenvolve liuhosi estudu komparativu.

“Tanba ne’e maka kooperativa komérsiu sai hanesan sentru ida atubele halo komersializasaun ba produtu agrikultór nian,” nia akresenta.

Iha enkontru ne’e, Embaixadór prontu fó tulun SEKoop dezenvolve área haat no sei avansa ba diskusaun téknika molok implementa.

Iha fatin hanesan, Embaixadór Brazil hateten, parte Embaixada komprometidu tulun SEKoop dezenvolve área kooperativa iha Timor-Leste.

“Ita boot sira hatene, Brazil iha área kooperativa ne’ebé dezenvolve di’ak tebes hanesan kooperativa agríkola no seluk tan, tanba ne’e ami prontu apoiu dezenvolve área hirak ne’e iha Timor-Leste,” Diplomata ne’e dehan.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here