Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, tersa (02/03). Imajen TATOLI/Egas Cristóvão

DILI, 29 abríl 2021 (TATOLI)—Reuniaun Konsellu Ministru aprova projetu Dekretu Governu, ne’ebé aprezenta hosi Primeiru Ministru, Taur Matan Ruak, hosi Dekretu Prezidente Repúblika númeru 24/2021, loron 28 abríl, hodi hatán ba pandemia COVID-19.

Projetu Dekretu Governu relasiona ho medida ezekusaun Estadu Emerjénsia (EE) da-XIII,  ne’ebé abranje ba teritóriu nasionál tomak no vigora entre tuku 00:00 loron 03 maiu no tuku 23:59 loron 01 juñu 2021.

“Destaka de’it katak ema sira hotu ne’ebé ho sertifikasaun vasina kompleta kontra COVID-19, lapresiza hala’o izolamentu profilátiku obrigatóriu (kuarentena) bainhira hosi rai-li’ur tama iha territóriu nasionál,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kinta ne’e.

Notísia relevante: Medida EE da-XII, kuarentena bele iha uma ho despaisu MS

Aleinde ne’e, sidadaun iha rai-laran bainhira atu ba munisípiu sira sei nafatin halo teste swab.

“Maibé iha fulan oin mai, kuandu vasina ba faze daruak iha ona no vasina kompletu ona, futuramente ita-nia sidadaun sira vasina kompletu ona, bele garante hikas movimentu ba mai munisípiu maibé daudaun ne’e presiza respeita nafatin rekezitu sira ba serka sanitária,” Portavós Governu esplika.

Enkuantu, regra sira-seluk mantein nafatin distánsia pelumenus metru ida ho ema seluk ne’ebé la hela iha ekonomia komun.

“Kontinua obriga atu utiliza máskara oin, ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál sira,” Ministru esplika.

Nune’e mós, industriál ka prestasaun servisu ka edifísiu sira ne’ebé  servisu administrasaun públika nian funsiona, maibé iha obrigasaun mós atu  evita formasaun halibur-malu iha dalan públiku.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here