Kondisaun estrada rurál postu administrativu Hatubilico, munisípiu Ainaro. Imajen TATOLI/António Gonçalves

DILI, 29 abríl 2021 (TATOLI)-Diresaun Jerál Administrasaun no Finansa (DGAF, sigla Portugés) hamutuk Diresaun Nasionál Aprovizionamentu (DNA) iha Ministériu Obra Públiku (MOP), finaliza ona avaliasaun proposta konkursu públiku estrada rurál hosi empreza lokál sira.

Tuir nota ne’ebé Agência TATOLI asesu iha kinta ne’e, empreza lokál sira ne’ebé kompete atu halo estrada rurál ba munisípiu hitu, maibé foin finaliza ba munisípiu haat hanesan Dili, Lautém, Manufahi no Viqueque.

“DGAF-DNA ensera ona prosesu avaliasaun proposta konkursu hosi empreza lokal sira,” refere nota ne’e.

Nune’e, ekipa avaliasaun hahú elabora relatóriu finál hodi halo aprezentasaun ba Ministru Obra Públiku, Salvador Eugênio Soares dos Reis Pires, hodi hetan aprovasaun finál.

Entretantu, MOP liuhosi DGAF-DNA avalia dokumentu konkursu públiku hosi empreza ba estrada rurál iha munisípiu hitu, maibé falta Baucau, Ainaro, Manatuto.

Munisípiu tolu hanesan pakote ne’ebé Governu aloka nia orsamentu iha liña ministériu, ba estrada rurál hamutuk pakote 18 no sei iha mós husi Fundu Infrastrutura ne’ebé nia prosesu tomak CNA mak sei lidera, hafoin DNA hetan verifikasaun prévia ba dezeñu no Bill of Quantity (BoQ) ne’ebé halo hosi Ajénsia Dezenvolvimentu Nasinoál (ADN).

Alende ne’e, ba munisípiu tolu seluk dokumentu hosi empreza sira DNA foin simu iha loron 15 abríl.

Totál empreza lokál ne’ebé partisipa iha konkursu ne’e, kada pokote mínimu empreza na’in-haat no másimu na’in-hitu to’o 10.

Ba pakote estrada rurál hamutuk 13 ne’ebé sei halo iha munisípiu Viqueque, Lautém no Manufahi inklui Dili hamutuk pakote rua.

Projetu estrada rurál ne’ebé sei reablita no manutensaun iha territóriu laran tomak iha 2021 hamutuk pakote 136 ne’ebé verikadu hosi ADN.

Hosi totál ne’e, fundu mai husi MOP rasik hamutuk pakote 67 no hosi Fundu Infrastrutura hamutuk pakote 69.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here