Sasán nesesidade bázika ne'ebé CVTL Liquiça oferese ba família afetadu iha Tibar, domingu (11/04/21). Imajen Tatoli/Hortencio Sanchez.

LIQUIÇA, 29 abríl 2021 (TATOLI) – Krús Vemella Timor – Leste (CVTL, sigla portugés) Munisipiu Liquiça apoiu ai-han ba idózus no inan isin-rua ne’ebé foin lalais afetadu ba dezastre natural iha Suku Tibar.

“Ai-han ne’ebé distribui mak hanesan, foos, mina, rinso, susubeen, ne’ebé kategoria ba nutrisaun no inan isin-rua ita fó basia, toalla, sabaun no seluk tan no inan  fó susu sira ita fó moskiteiru fó mós fore-mungu, susubeen no sasán bebé nian,” Brans Official CVTL Liquiça, Anani Wele Soares informa ba Agência Tatoli iha Tibar, kinta ne’e.

Notísia Relevante : Uma 24 iha Tibar rai taka total

Nia dehan, tuir dadus ne’ebé CVTL identifika ba idózus ne’ebé hetan dezastre naturál  hamutuk na’in-11, inan isin-rua na’in-neen (6) no inan fó susu bebé na’in-13.

“Hosi dadus ne’e kompostu família 23 tanba ne’e total ema 30 mak sei simu apoiu sira-ne’e ,” nia dehan.

Apoiu CVTL nian ba dala rua ona hodi tulun vítima inundasaun sira iha Tibar. Enkuantu iha faze da-uluk CVTL Liquiça apoiu nesesidade báziku ba família uma-kain 60-resin.

Iha fatin hanesan, inan isin-rua ne’ebé simu apoiu hirak ne’e, Laurinda da Conceição hateten, sente kontente tanba CVTL bele oferese ona sasán báziku ba sira.

“Agradese tebes ba CVTL tanba bele ajuda ona ami. Sasán ohin ami simu ne’e mak toalla, basia ba bebé atu hariis, sabaun bebé nian, foos balun, fore-mungu, susubeen no seluk tan,” Laurinda hateten.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here