Atividade durante ezisténsia JSMP. Imajen/JSMP.

DILI, 28 abríl 2021 (TATOLI)—Organizasaun Naun Governamentál, Programa Monitorizasaun Sistema Judisiál  (JSMP), kompleta ezisténsia tinan 20 hodi kontribui ba prosesu dezenvolvimentu iha setór justisa no lejislativu iha Timor-Leste (TL).

Selebrasaun aniversáriu ba dala 20, JSMP lansa relatóriu tinan 2020 hamutuk haat (4) ho meiu online mak hanesan, relatóriu anuál rua (2) kona-bá Observasaun Jerál ba Setór Justisa (OJS) no Relatóriu Observasaun Parlamentár (ROP), relatóriu institusionál JSMP no relatóriu temátiku ida kona-bá mekanizmu ba garante konstituisaun no impeachment ba Prezidente Repúblika.

Notísia relevante:JSMP apresia produtividade V lejislatura

“Hanesan tinan kotuk, tinan ne’e JSMP kontinua lansa relatóriu-sira liuhosi online hodi kumpre medida-sira prevensaun COVID-19 no iha tempu hanesan JSMP mós selebra aniversáriu kompleta tinan 20. Tanba ne’e, JSMP agradese ba parte hotu ne’ebé apoiu no kontribui desde ezisténsia, husu nafatin atu kontinua fó apoiu,” Diretora Ezekutiva JSMP, Ana Paula Marçal hateten liu hosi komunikadu ne’ebé Agencia Tatoli asesu, kuarta ne’e.

Nota ne’e haktuir, relatóriu observasaun jerál setór judisiáriu diskute kona-bá progresu no dezafiu-sira iha setór justisa-nian, inklui estatístika kazu-sira ne’ebé julga iha Tribunál Distritál-sira no Tribunál Rekursu durante tinan 2020. Partikularmente relatóriu ne’e elabora kazu-sira ne’ebé julga iha Tribunál Distrital-sira.

Relatóriu Observasaun Parlamentár subliña kona-bá funsionamentu no efetividade serbisu Parlamentu inklui pontualidade deputadu-sira iha Parlamentu iha 2020.

Relatóriu Institusionál, rezumu JSMP nia atividade-sira no kooperasaun serbisu ho organizasaun seluk durante 2020, inklui apoiu finansiamentu ne’ebé JSMP simu hosi doadór-sira.

Relatóriu temátiku, deskreve kona-bá rezultadu peskiza no análiza kona-bá situasaun polítika ne’ebé akontese durante ne’e, liuliu kona-bá asaun polítika, tantu hosi titular-sira órgaun soberanu, públiku jerál kona-bá atu garante Konstituisaun no halo impeachment ka prosesu hasoru Prezidente Repúblika.

JSMP espera katak, rekomendasaun importante iha relatóriu ne’e bele hetan konsiderasaun hosi instituisaun relevante-sira hodi hadi’ak funsionamentu sistema justisa formál no lejislativu di’ak liutan iha futuru.

Ezisténsia

JSMP  harii iha 28 abríl 2001, hosi ativista direitu umanu na’in-tolu mak hanesan, Christian Ranheim, Caitlin Reiger no Nelson Belo, ho atividade prinsipál atu halo monitorizasaun ba prosesu julgamentu ba kazu krime grave 1999 iha Tribunál Adhoc Jakarta-Indonézia.

JSMP eziste hanesan organizasaun naun-lukrutivu iha Timor-Leste ne’ebé serbisu atu hadi’a sistema justisa no lezislativu iha Timor-Leste, liuhosi halo advokasia hodi promove legalidade, transparénsia, akontabilidade no hametin Estadu-de-direitu.

Misaun
JSMP sei serbisu ho espíritu kolaborativu hodi promove no proteje demokrasia, lei, justisa no direitu umanu liu hosi monitorizasaun, edukasaun legál no advokasia asisténsia legál ba vítima.

Vizaun

Sosiedade demokrátiku ne’ebé garantia justisa no direitu umanu ba ema hotu.

Inísiu JSMP harii iha unidade rua mak hanesan unidade peskizadór jurídiku no unidade Outreach, maibé depois halo monitorizasaun iha tribunál nota katak, iha feto barak mak seidauk hatene kona-bá oinsa atu prosesu-sira ninia kazu tuir dalan justisa formál, nune’e iha 2004 hamosu-tan unidade ida ho naran unidade justisa ba feto (Woman Justice Unit), hafoin  ne’e liuhosi peskiza no konsultasaun ho instituisaun relevante-sira deskobre katak, feto barak mak sai vítima ba krime violénsia bazeia ba jéneru.

Nune’e, iha 2005, JSMP harii-tan unidade ida ho naran unidade suporta vítima (Victim Support Service).

Papél JSMP ida mós liu hosi advokasia ho prinsípiu ida atu ajuda hasa’e nível kumprimentu sistema justisa Timor-Leste ho padraun direitu umanu internasionál, partikularmente sira ne’ebé iha relasaun ho julgamentu ne’ebé justu, hodi kontribui ba prátika governasaun ne’ebé di’ak.

Hafoin tinan sanulu ezisténsia JSMP, habelar-tan ninia vizaun hodi hamosu-tan unidade ida ho naran Projetu Observasaun Parlamentár (Parliament watch Project) iha 2010, ne’ebé ho atividade prinsipál maka halo observasaun ba prosesu lezislativu iha Parlamentu liuliu ba Komisaun A.

Tuir mai, iha tinan 2012, JSMP deklara-tan ba públiku hodi halo transformasaun Unidade Victim Support service (VSS) iha JSMP, sai hanesan organizasaun independente ida ho naran Asisténsia Legál ba Vítima Feto no Labarik (ALFeLa), hodi fó tulun ba vítima hosi violénsia bazeia ba jéneru liuliu ba feto no labarik-sira hanesan mós ho ninia-naran.

Atividade prinsipál-sira mak hanesan, monitorizasaun ba prosesu julgamentu iha tribunál, observasaun ba prosesu lejislativu, inklui sesaun plenáriu hotu-hotu iha Parlamentu Nasionál no mós atividade komisaun A.

JMSP mós  fahe informasaun liuhosi treinamentu ba xefe suku, lia na’in-sira, grupu joventude feto no mane inklui estudante-sira no polísia.

Aliende ne’e, prodús mós programa debate ba issue temátiku iha TV no estasaun rádiu komunidade-sira ne’ebé eziste iha Munisípiu-sira iha territóriu, advokasia ba asuntu relevante-sira no mós asisténsia legál ba vítima violénsia bazeia ba jéneru.

Atividade sira ne’e hala’o liuhosi Unidade haat mak hanesan Unidade Peskizadór Jurídiku (Legál Research Unit), Unidade Projetu Observasaun Parlamentár (Parliament Watch Project), Unidade Treinamentu no Advokasia (Training and Advocacy). Unidade sira-ne’e hetan apoiu hosi unidade manajementu (Management Unit).

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here