Eis Prezidente Repúblika, José Ramos Horta. Imajen Tatoli/Jogerjo Guterres.

DILI, 28 abríl 2021(TATOLI)—Laureadu Prémiu Nobel da Paz, José Ramos Horta, hateten timor-oan sira labele enfrakeza fali Estadu no Governu nia esforsu ba prevensaun no kombate COVID-19 iha Timor-Leste tanba razaun polítika ka partidária.

Notísia Relevante: Prevensaun COVID-19, Horta kestiona Governu nia efikásia no efisiénsia

“Ita labele halo buat ne’ebe enfrakeza fali Estadu no Governu nia esforsu halo kombate ba COVID-19, tanba razaun polítika ka partidária ne’e, ita labele halo ida-ne’e. Tanba impaktu bele boot loos ba povu,” Ramos Horta hateten ba jornalista liuhosi konferénsia imprensa, iha Faról, Dili, kuarta ne’e.

Bazea ba esperiénsia hanesan situasaun iha India ne’e, nia hateten, sai avizu ida ba ema hotu iha Ázia no iha mundu tomak katak nu’udar sidadaun ida iha responsabilidade la’ós tanba títulu ofisiál ruma, maibé povu ka joven fiar karik buka esforsu ajuda Estadu hodi kontribui no kombate COVID-19 iha Timor-Leste ne’e.

“Serbisu ne’ebé ita-nia Governu halo dezde hahú iha marsu iha 2020 no Governu liuhosi Ministériu Saúde (MS) no Organizasaun Mundiál Saúde (OMS) fó sai katak uza máskara, fase liman, distansiamentu sosiál no fíziku bainhira nesesidade sai ba liur ne’e, di’ak liu kumpre no halo tuir,” nia dehan.

Eis Prezidente Repúblika ne’e husu ba timor-oan sira atu fiar no halo tuir regra Governu nian ne’ebé implementa ona. Ramos Horta apela ba povu hotu-hotu atu proteje-aan, halo ezersisíu fíziku, han aifuan oioin hanesan sabraka, ainanas, hudi, pateka, modo-tahan tanba hirak ne’e mak iha vitamina C no evita konsumu masin-midar, sigaru, no alkól.

Maibé, nia dehan, sei implementa serka sanitaria no konfinamentu domisiliária entaun Governu mós tenke haree subsídiu ne’e labele halo fali hanesan Cesta Bázika maibé haree produtór no importadór sira, para tuir prosesu normál merkadu nian tanba sira mak iha rede distribuisaun.

Tuir nia, bainhira aplika lockdown tenke iha alimentasaun rezerva maibé la’ós ba alimentasaun de’it, maibé iha rezerva aimoruk ba ospitál referál, klinika, Sentru Saúde sira, haree orfonatu, eskola no relijiaun sira atu oinsá halo apoiu ba sira,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here