Foto google

DILI, 28 abríl 2021 (TATOLI)—Posibilidade Sentru Formasaun Jurídika no Judisiáriu (SFJJ), sei hahú fó formasaun ba kandidatu juíz, iha fulan juñu.

“Prosesu rekrutamentu ba kandidatura atu tuir formasaun sai juiz oras ne’e daudaun iha ona prosesu finál. Bainhira buat hotu la’o di’ak, ita bele hahú formasaun iha juñu,’’ Ministru Justisa (MJ), Manuel Cárceres da Costa hateten ba jornalista Agência Tatoli iha Faról, tersa ne’e.

Notísia relevante:SFJJ loke vaga ba formasaun juis

Nune’e mós Diretór Sentru Formasaun Jurídika no Judisiáriu (SFJJ), Antonino Gonçalves informa  ba Agencia Tatoli via telefónika kuarta ne’e, katak, prosesu faze dahuluk  ba inskrisaun  kandidatu ba formasaun atu sai juiz iha SFJJ hamutuk na’in 209 ne’ebé pasa iha selesaun dokumentu.

SFJJ sei haruka lista kandidatu definitivu hodi publika iha jornál repúblika, hafoin marka loron ba faze teste eskrita no  bainhira pasa mak sei tuir tan teste orál.

Antonino Gonçalves informa mós katak,  prosesu vaga daruak ba formasaun atu sai prokuradór  no defensór públiku oras ne’e dadaun loké hela ba públiku.

“Prosesu kandidatu juiz nian, besik remata ona. Tanba ne’e, depende ba situasaun COVID-19, bainhira buat hotu la’o di’ak iha maiu nia laran bele tuir ezame eskrita no orál. Bainhira pasa, hahú formasaun no mós ba prokuradór no defensór ninian,” nia dehan.

Entretantu, vaga ba formasaun atu sai juiz, prokuradór no defensór  presiza Timoroan ne’ebé lisensiadu iha área direitu no  kada área presiza  kanditadu na’in 23, hodi bele tuir formasaun, ikus-mai sira ne’ebé valór di’ak liu sei prienxe ba vaga 15.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here