Estudante-sira iha Ensinu Báziku Sentrál Terseiru Síklu 30 de Agosto Comoro, hein hela atu foti sumáriu eskola, segunda (26/04/21). Imajen Tatoli/Cipriano Colo.

DILI, 28 abríl 2021 (TATOLI)—Polísia Nasionál Timor Leste (PNTL) liu hosi Komandu Munisípiu Dili koopera ho Ministériu Edukasaun Joventude no Desportu (SEJD) hodi hala’o sensibilizasaun ba estudante-sira hosi eskola privada no públika iha kapitál Dili, atu kumpre nafatin protokulu saúde, nune’e evita transmisaun COVID-19.

Sensibilizasaun ne’e realiza tanba parte PNTL ho MEJD haree katak, estudante-sira hosi eskola Ensinu Sekundáriu 4 Setemru Balide, eskola Ensinu Tékniku Vokasionál Becora, eskola Ensinu Sekundáriu 5 de Maiu Becora, la kumpre regra protokolu saúde hanesan la uza máskara no halibur-malu barak.

Notísia relevante:PNTL kontinua sensibiliza komunidade atu prevene COVID-19 iha Dili

Diretór Jerál Ensinu Sekundáriu, MEJD, Deolindo da Cruz, hateten bainhira estudante-sira la kumpre regra Serka Sanitária hodi prevene an hosi COVID-19, posibilidade moras ne’e bele aumenta makaas liu tan iha Timor-Leste (TL).

“Hahú kedan segunda to’o agora, ita-nia oan-sira ba foti sumáriu iha eskola-sira la kumpre protokolu Ministériu Saúde no Organizasaun Mundiál Saúde, kona-bá prevensaun COVID-19,” Deolindo da Cruz hateten ba jornalista-sira iha, Becora, kuarta ne’e.

Tanba ne’e, nia alerta ba estudante-sira atu uza nafatin máskara, fase liman bebeik no evita halibur-malu iha grupu boot, hodi evita cluster foun COVID-19 iha eskola-sira.

MEJD sei kontinua halo observasaun ba eskola-sira ne’ebé la prepara bee no ai-moruk dezinfekta, bainhira deteta sei foti medida atu la fó autorizasaun ba realizasaun programa aprendizazen.

“Bainhira eskola no estudante-sira la kumpre, ita koordena ho polísia sei suspende sira-nia atividade. Estudante-sira ne’ebé la kumpre regra, PNTL sei halo detensaun hodi prosesa tuir lei,” nia hateten.

Iha fatin hanesan, Komandante PNTL Munisipiu Dili, Superintendente Xefe, Henrique da Costa dehan, PNTL sei implementa regra atu regula eskola-sira ne’ebé loke ona prosessu aprendizazen, maibé la kumpre regra Serka Sanitária.

“Eskola-sira ne’ebé hahú ona aula, ita halo ona vizita hodi sosializa regra ba sira atu kumpre nafatin tanba COVID-19 moras ida perigu,”  nia hateten.

Ekipa Komandu PNTL Dili sei kontinua halo sensibilizasaun ba eskola sira inklui fatin públiku hanesan, loja, merkadu, banku no seluk tan atu kumpre nafatin regra hodi hakotu transmisaun korrente peste letál COVID-19 iha TL.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here