PNDS presiza fasilitadór 198 reforsa ekipa tékniku konstrui “Uma Kbiit Laek”

DILI, 28 abríl 2021 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudina Soares Pinto, hatete PNDS presiza fasilitadór hamutuk 198 hodi reforsa ekipa tékniku iha terrenu liuliu ba programa konstrusaun “Uma Kbiit Laek” ba ema kbiit laek sira.

Notísia Relevante: Marsu 2021, Governu hahú konstrui uma 1.272 ba kbiit laek

“Tinan ida-ne’e, ita presiza forsa de trabalho ne’ebé atu reforsa ekipa tékniku iha terrenu kuaze 198 maibé forsa de trabalho la’ós ba Uma Kbiit Laek (UKL) de’it maibé servisu hotu iha baze,” Claudina Soares Pinto hateten ba jornalista TATOLI, liuhosi telefónika, kuarta ne’e.

Tuir nia, fasilitadór sira ne’e simu ona formasaun iha área sosiál, téknika no finansa durante semana tolu no tersa (27/04) horisehik ramata ona. Hosi ema na’in-198 ne’e kada Postu Administrativu presiza fasilitadór na’in tolu (3) maibé iha Postu Administrasaun balun ne’ebé presiza liu ema na’in-tolu (3) tanba depende ba benefisiáriu “Uma Kbiit Laek” iha kada aldeia ida.

Entretantu, Diretór Jerál Dezenvolvimentu Rurál, Ministériu Administrasaun Estatál (MAE), Rosito Guterres hateten formasaun ne’ebé oferese ba fasilitadór sira ne’ebé MAE oferese liuhosi PNDS ne’e mak iha formasaun tolu hanesan sosiál, tékniku no finansa.

Nia esplika, kona-ba sosiál nian presiza aprende akuntabilidade no kompeténsia atu esplika matadalan ba ema no iha kapasidade atu lidera akuntabilidade no halo sensibilizasaun ba cash book no sai motivadór ida hodi esplika matadalan ne’e ba ema.

Formasaun tékniku nian, nia dehan, téknikamente fasilitadór sira tenke hatene halo dezeñu uma no tékniku foti BoQ, nune’e bele konstrui “Uma Kbiit laek, tuir uma ba benefisiáriu sira iha kada aldeia.

Kona-ba finansa, Diretór Jerál ne’e hatete automatikamente fasilitadór sira tenke hatene asuntu finansa, kontabilidade no oinsá halo levantamentu ba osan iha banku no akompañia ekipa implementadór ba “Uma Kbiit Laek” (UKL) iha terrenu hodi halo relatóriu.

“Kompeténsia ida-ne’e, ami foti bazea ba nesesidade ba programa ida-ne’e hodi bele kapasita sira. Formasaun ne’e oferese hosi Ajénsia internasionál  PARTISIPA, maibé ita mós servisu hamutuk ho Instituisaun Indimo no Sentru Treinamentu Tibar,” nia dehan.

Formasaun ba fasilitatór másimu ne’e fulan tolu no mínimu fulan rua, maibé nia dehan ho situasaun COVID-19 ne’e parte MAE simplifika fali katak treinamentu iha ida-idak nia munisípiu no hala’o iha semana tolu nia laran de’it.

Fasilitador hirak ne’e, MAE rekruta hanesan funsionáriu kontratadu de’it tanba bainhira finaliza konstrui Uma Kbiit Laek ne’e sira-nia kontratu mós ramata ona. Fasilitador sira-ne’e tenke hatene di’ak iha área sosiál, tékniku no finansa, atu nune’e sira bele fasilita ekipa tékniku iha terrenu.

Notísia Relevante: Trimestre dahuluk, MAE konstrui “Uma Kbiit Laek” ba ema kbiit laek

Jornalista: Osória Marques

Editór : Cancio Ximenes