Ministru Justisa, Manuel Cárceres da Costa. Imajen/António Gonçalves.

DILI, 28 abríl 2021 (TATOLI)—Ministériu Justisa (MJ), ezekuta Orsamentu Jerál Estadu (OJE) 2021 to’o ona 21.9%, tuir Portál Transparénsia ne’ebé Agência Tatoli asesu iha kuarta (28/04).

Nune’e, gastu oríjen hamutuk $14,842,589.00, kompromisu $969,090.45, obrigasaun $712,305.86, atuál $2,537,459.36 no saldo $10,623,733.33.

Notísia relevante:2021, MJ prioritiza matéria reforma judisiária no formasaun ba autór judisiáriu

Ministru Justisa, Manuel Cárceres da Costa, hateten rezultadu hosi ezekusaun ministériu nian haree ba atividade orsamentu ne’ebé prevee oitoan iha kapitál dezenvolvimentu maka, halo moru iha prizaun Gleno, prizaun Becora no mós sei hadi’a balkaun iha Diresaun Rejistu Notariadu, hodi fó atendimentu di’ak liu-tan ba públiku.

Nia informa, MJ ninia orsamentu restu aloka ba bens serbisu no iha proposta ba dezastre naturál halo bee tama bloku tolu iha prizaun Becora, no moru sentru formasaun jurídika hetan estragu tanba ne’e presiza hadi’a.

“Ba trimestre tuir-mai, sei foka hodi haree ba lei sira ne’ebé Ministéiru prepara no iha ona Parlamentu Nasionál, kona-bá formasaun juiz, prokuradór no defensór públiku ne’ebé sei la’o. Iha tinan ne’e atividade diseminasaun lei suspende tanba ho situasaun COVID-19,” Manuel Cárceres hateten ba Jornalista Agéncia Tatoli iha Farol, tersa ne’e.

Governante ne’e garante katak, MJ sei ezekuta Orsamentu Jerál Estadu (OJE) 2021 ho di’ak no susessu to’o dezembru.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here