MUTL ho AUTL halo konferénsia imprensa hodi husu MESSK reativa aula normal ba UNTL, kuarta (28/04). Imajen TATOLI/Egas Crstovão.

DILI, 28 abríl 2021 (TATOLI) – Movimentu Universitáriu Timor-Leste (MUTL) ho Aliansa Universitáriu Timor-Leste (AUTL) ezije ba Governu liuhosi Ministériu Ensinu Superior Siénsia no Kultura (MESSK) atu re-ativa  hikas aula normál iha instituisaun ensinu superiór públiku, Universidade Nasional Timor Lorosa’e (UNTL) tanba sistema implementasaun programa online ne’e la benefisia estudante-sira.

Portavóz MUTL, Gama Lemorai, kuarta ne’e, hateten ba jornalista-sira katak MUTL la konkorda implementasaun eskola online ne’e tanba liña internet de’it to’o agora labele perkore to’o area remotas.

“Ami rejeita Governu ninia apoiu hodi fó $10 bá kada estudante ho internet gigabyte ida tanba ita la’ós nasaun ida avansadu hanesan nasaun sira seluk, ita nia nasaun TL moris hela ho kondisaun rai-rahun, ita seidauk iha liña internet ida ne’ebé bele perkore to’o area rurál sira,” Gama Lemorai hateten iha kampus UNTL, Fakuldade Ekonomia, Liçeo, Dili.

Gama afirma katak sira-nia ejijénsia hakarak re-ativa hikas aula normál ne’e ho medida prevensaun sira. Nune’e  husu ba MESSK atu dada hikas osan sira ne’ebé mak re-aloka hodi apoiu liña internet no injesaun propina bá estudante-sira ne’e bele utiliza fali hodi sosa ekipamentu prevensaun COVID-19 nian.

Biban ne’e, portavós AUTL Francisca da Silva akresenta katak impregnasaun eskola online ne’e la benefisia estudante sira tanba estudante barak mak laiha telefone android atu asesu programa online ne’e.

Iha fatin hanesan estudante husi fakuldade Arte Edukasaun Umaniora (FAEH) Guilhermino Maria de Araújo dehan, karik ejijénsia aula normál ne’e mak realia duni sira husu parte Universidade bele monta ekipa kontrolu saúde hodi bele kumpre nafatin regra protokolu ne’ebé fó sai ona hosi Organizasaun Mundial Saúde (OMS)  ho Ministériu Saúde (MS).

Hatán ba reklamasaun MUTL ho AUTL  nian ne’e, Ministru Ensinu Superior Siénsia no Kultura (MESSK), Longuinhos dos Santos afirma katak, ema hotu iha direitu atu halo komunikasaun maibé tenke kumpre lei ne’ebé mak aprova ona iha Parlamentu Nasionál.

Longuinhos informa katak media ne’ebé mak hetan ona desizaun iha PN ne’e media ida refutavel. Governu  propoin implementasaun liña internet ba IESPP sira-ne’e tanba kauza mundiál ho COVID-19.

“Ita nia Governu haree kestaun ida ne’e maka foti desizaun hodi apoiu orsamentu millaun $2.1 hodi apoiu subsídiu internet ba estudante sira no estabelesimentu internet ba IESP sira karik presiza atu update inklui peskiza ruma bele nesesita sira,” Longuinhos dos Santos hateten.

Jornalista       : Tomé Amado

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here