DILI, 28 abríl 2021 (TATOLI)—Joven hosi Grupu Knua Indústria Kreativu no Formasaun (KIK & F) na’in-21 ho vontade rasik hakarak envolve-an hodi aprende lala’ok kooperativa produsaun liuhosi formasaun.

Koordenadór Jerál Grupu  KIK & F, Octaviano Maria Oscar, hateten, joven sira ho vontade tomak hakarak envolve-an iha área kooperativa tanba ne’e sira tuir formasaun durante loron haat, ne’ebé organiza rasik hosi Sekretaria Estadu Kooperativa (SEKoop) liuhosi Diresaun Nasionál Kooperativa Produsaun Integradu.

“Objetivu ami mai tuir formasaun tanba ami  atu harii kooperativa no atu aprende kle’an liután lala’ok kooperativa nian,” Koordenadór dehan ba Agência TATOLI, iha Federasaun Hanai Malu, Bairro Pité, kuarta ne’e.

Grupu ne’e akumula maioria joven, ne’ebé balun hanesan estudante no balun dezempregu, tanba ne’e hakarak buka esperiénsia.

“Ami hakarak harii kooperativa ramu produsaun, ne’ebé kooperativa ne’e rasik foku transforma produtu lokál ho teknolojia no kualidade di’ak, atu nune’e ema bele konsumu no bele rai ba tempu kleur,” nia akresenta.

Nia konfesa, durante ne’e grupu kreativu halo produsaun batar maibé laiha legalidade ruma atu fa’an iha loja.

“Tanba ne’e ami mai tuir formasaun atu hatene kle’an kona-ba lala’ok kooperativa, karik aban bain-rua ami bele forma kooperativa hodi bele iha legalidade no ami-nia produtu bele fa’an ona iha supermerkadu,” nia hatutan.

Iha fatin hanesan, Diretora Kooperativa Produsaun hosi SEKoop, Jacinta dos Santos, fasilita formasaun kooperativa produsaun ba joven sira hodi aumenta koñesimentu kona-ba kooperativa produsaun.

“Ami fó formasaun iha área kooperativa produsaun nian tuir lei númeru 16/2004, tanba ita hatene katak joven agora daudaun halo ona produsaun batar,” nia tenik.

Tanba ne’e, ho  formasaun bele fasilita joven sira, nune’e ba futuru bele halo aktividade ho di’ak.

“Ami husu, ba oin tenke halo sira-nia atividade ne’e di’ak liután,” nia apela ba formandu sira.

Entretantu, Grupu KIK & F hahú halo ona produsaun batar transforma ba kripik durante tinan ida resin ona.

Jornalista: Natalino Costa      

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here