Komandante PNTL Munisípiu Dili, Superintendente Xefe Hendrique da Costa. Imajen/Eugénio Pereira

DILI, 28 abríl 2021 (TATOLI)—Hahú janeiru to’o marsu, departamentu kriminál Komandu Polísia Nasionál Timor Leste (PNTL) Munisipiu Dili, rejista kazu krime hamutuk 367.

Komandante PNTL Munisípiu Dili, Superintendente Xefe, Henrique da Costa hateten kazu krime hirak-ne’e rejistadu barak liu mai hosi eskuadra PNTL Dom Aleixo.

Notísia relevante:Janeiru-abríl PNTL rejista kazu krime 1.016

“Kazu krime ne’ebé rejistadu, barak-liu mai hosi eskuadra Dom Aleixo no maioria ofensa integridade fézika hamutuk 192, kazu maus tratos no seluk tan,” Henrique da Costa hateten ba jornalista-sira iha Komandu PNTL, Caicoli, kuarta ne’e.

Durante fulan tolu nia-laran, Komandu PNTL  aprezenta mós autór hamutuk 153 ba Ministériu Públiku (MP), nu’udár na’in ba prosesu, atu prosesa ba Tribunál Distritál Dili (TDD).

Tuir relatóriu PNTL Munisípuu Dili, kazu krime hirak-ne’e  akontese tanba problema umanu, hemu tua lanu ne’ebé envolve grupu juventude.

Komandu PNTL sei kontinua koopera ho Ofisiál Polísia Suku (OPS), Membru Konsellu Polisiamentu Komunitária (KPK) atu kontinua halo patrullamentu rutina, hodi evita krime iha Dili.

Antes ne’e, Komandu Jerál PNTL liu hosi portavóz Superintendente Xefe, Arnaldo de Araújo fó-sai ona okatak, hahú janeiru to’o abríl, PNTL liu hosi departamentu kriminál, rejista kazu krime iha territóriu tomak hamutuk 1.016.

Númeru kazu krime ne’ebé Komandu Munisípiu-sira relata durante periúdu reportájen hosi 1 janeiru to’o 20 abríl, domina ho kazu agresaun fízika.

Jornalista: Eugénio Pereira

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here