Membru Parlamentu Nasionál iha sala Plenária Parlamentar. Imajen TATOLI/Egas Crstovão.

DILI, 28 abríl 2021 (TATOLI)—Reprezentante Povu iha uma fukun Parlamentu Nasionál husu Governu konsidera avaliasaun hosi Sentru Integradu ba Jestaun Krize (CICG-sigla portugés) iha avaliasaun hodi halo melloramentu ba medida ezekusaun iha prevensaun no kombate surtu COVID-19.

Notísia Relevante: CIGC rekomenda opsaun tolu ba Governu kombate transmisaun komunitária

“Avaliasaun ne’ebé CIGC halo ne’e hatudu dezafiu, difikuldade no pontu fraku barak, ho nune’e rekomenda ba Governu haree ho sériu ba avaliasaun hirak ne’ebé mak halo ona no rekomendasaun ne’ebé mak hato’o tuir aprezentasaun CIGC,” Xefe Bankada Frente-Mudança, Deputada Isabel Freitas Ximenes, ko’alia iha debate renovasaun estensaun estadu emerjénsia ba dala-13, iha uma fukun, kuarta ne’e.

Ho rekomendasaun ne’e, nia hatutan, Governu presiza halo diseminasaun informasaun no divulgasaun ba regra serka sanitária ho rigór no orientasaun kona-ba COVID-19 tanba durante ne’e menus no fraku  liu iha implementasaun.

Nia argumenta, implementasaun estadu emerjénsia ho objetivu atu trava surtu COVID-19 importadu, maibé prátika hatudu katak objetivu trava surtu COVID-19 ne’e la la’o ho efetivu.

“Tanba kazu COVID-19 ne’ebé komesa ho kazu importadu, oras ne’e tama ona iha kontájiu komunitáriu. Hanesan relatóriu hosi CIGC katak Dili mak sentru ba transmisaun. Se bele ita izola Dili no territóriu tomak ba períodu loron 30 nia laran ka bele liu tan,” nia propoin.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here