Xefe Bankada Frente-Mudança (FM), Deputada Isabel Maria Barreto Freitas Ximenes. Imajen TATOLI/Evaristo Soares Martins.

DILI, 28 abríl 2021 (TATOLI)—Bankada Frente-Mudança (FM) iha Parlamentu Nasionál husu hola medida ida hodi kontra ema-ne’ebé impede serbisu médiku iha prevensaun surtu COVID-19 tanba médiku sira halo funsaun ba ema hotu nia di’ak.

“Ita haree katak ekipa liña frente prinsipalmente médiku sira-ne’ebé hetan agresaun fíziku iha dedikasaun traballu, Governu tenke fó atensaun didi’ak ba situasaun ida-ne’e tanba médiku sira hala’o funsaun ba ema hotu nia di’ak,” Xefe Bankada FM, Deputadu Isabel Maria Barreto Freitas Ximenes, hato’o hanoin ne’e iha debate renovasaun deklarasaun estadu emerjénsia ba dala-XIII, iha Parlamentu Nasionál, kuarta ne’e.

Xefe Bankada Frente Mudança ne’e sujere Governu hola medida hodi bele evita situasaun ne’e akontese tán iha futuru. Tanba, ekipa liña frente liuliu médiku sira dedika-aan tomak atu salva Timoroan tomak hosi moras invizivel ne’e maibé ema balun impede.

Reprezentante Povu ne’e husu VIII Governu Konstitusionál atu konsidera hanoin ne’e iha medida foun ne’ebé sei deside hosi parte ezekutivu liuhosi desizaun koletiva Konsellu Ministru.

Xefe Bankada Frente-Mudança ko’alia kestaun ne’e relasiona ho ema balun baku médiku iha Covalima no iha Dili, no ema balun la koopera bainhira ekipa saúde sira atua iha terrenu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here