Serimónia entrega mákina Presaun Pozitiva Kontínua Vias Respiratórias (CPAP) 20, entre Embaixadór EUA, Kevin Blackstone ho Xefe Gabinete Kooperasaun Defeza, Majór Pablo Valerin ba Brigadeiru Jenerál ‘Aluk’ Descartes. Imajen/Embaixada EUA.

DILI, 28 abríl 2021 (TATOLI)—Embaixada Estadu Unidu Amérika (EUA) iha Timor-Leste (TL), oferese mákina Presaun Pozitiva Kontínua Vias Respiratórias (CPAP) hamutuk 20 no Kapus Terapia Oksijéniu lubuk-ida ba Governu Timor-Leste liuliu ba Gabinete Sentru Integradu Jestaun Krize (SIJK).

Fornesimentu mákina hirak-ne’e, hanesan parte ida hosi Embaixada-nia apoiu kontínua ba Timor-Leste nia resposta hasoru pandemia COVID-19.

Notísia relevante:EUA hakarak apoia vasina ba Timor-Leste

Durante pandemia ne’e, médiku Amerikanu-sira iha Universidade Rhode Island konverte ona mákina CPAP hodi uza atu trata problema respiratóriu ho forma foun tratamentu oksijéniu la invazivu ba pasiente COVID-19.

Ekipamentu hirak-ne’e sei permite profisionál saúde liña frente-sira bele fornese terapia oksijéniu ne’ebé ema barak bainhira presiza.

Sasán hirak-ne’e entrega hosi Embaixadór EUA, Kevin Blackstone no Xefe Gabinete Kooperasaun Defeza, Majór Pablo Valerin ba Brigadeiru Jenerál ‘Aluk’ Descartes.

“EUA oferese daudaun ekipamentu médiku importante hirak-ne’e ba Governu TL hodi ajuda hatán ba COVID-19. Sasán hirak-ne’e komprova ona uza ho di’ak tebes iha tratamentu ba pasiente COVID-19 iha EUA. Sasán doasaun hirak-ne’e sei fó ba espesialista-sira kuidadu saúde-nian ho opsaun tratamentu oioin,” Embaixadór EUA, Kevin Blackstone, hateten liu hosi komunikadu, kuarta ne’e.

Sasán hirak-ne’ebé fornese hosi Universidade Rhode Island no Guarda Nasionál Rhode Island, halo parte iha Programa Parseria Estaduál (SPP), ne’ebé estabelese entre Rhode Island no Timor-Leste.

SPP nu’udár Ministériu Defeza EUA nia programa kooperasaun seguransa ne’ebé liga Guarda Nasionál hosi Estadu ida ka territóriu ida EUA nian ho forsa armada, forsa seguransa, ka ajénsia governamentál hosi país parseiru ida atu responde ba emerjénsia no dezastre sira.

Oras ne’e daudaun, programa ne’e la’o ona durante tinan 27 hodi oferese relasaun kooperasaun, ho benefísiu ba parte rua no dura ba tempu naruk entre Estadu ida-idak EUA-nian no nasaun parseiru-sira iha mundu tomak.

Projetu ne’e mai aumenta tan ba montante liu millaun $1,6 ne’ebé EUA kompromete ona hodi tulun Governu Timor-Leste kombate COVID-19 no montante inisiál billaun $2, hosi planu totál billaun $4, hodi apoia Kompromisu Avansadu ba Merkadu COVAX nian, ne’ebé sei apoia distribuisaun vasina COVID-19 ba país-sira liu 90 inklui Timor-Leste.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here