Koordenadór Estadu-Maiór, Sala Situasaun CIGC, Komodoro Donaciano Costa Gomes ‘Pedro Klamar Fuik’. Imajen/IDN

DILI, 28 abríl 2021 (TATOLI)Sala Situasaun-Sentru Integradu Jestaun Krize (CIGC, sigla Portugés) propoin ba Governu liuhosi Ministériu Saúde (MS) atu halo teste masál iha munisípiu sira ne’ebé impoin Serka Sanitária tanba daudaun munisípiu Dili sai ona sentru transmisaun komunitária iha Timor-Leste.

“Sala Situasaun hanoin loron-14 ba Serka Sanitária no Konfinamentu Jerál no parsiál obrigatóriu presiza halo asaun teste masál no iha tempu hanesan bele vasina iha sidadaun sira-nia hela fatin no halo ba sidadaun tomak ne’ebé mak aplika Serka Sanitária,” Koodenadór Estadu Maiór Sala Situasaun CIGC, Komodoro Donaciano Costa Gomes ‘Pedro Klamar Fuik’, hateten iha ámbitu debate estensaun Estadu Emerjénsia ba dala-XIII, iha sala plenária Parlamentu Nasionál, kuarta ne’e. 

Nia haktuir, durante loron 52 nia-laran, rejista totál kazu pozitivu hamutuk 1.495 no kazu komulativu dezde 01 marsu 2020 to’o 27 abríl 2021 hamutuk 2.044 no hosi númeru ne’e iha  kazu aktivu 1.000-resin.

“Durante loron 52 ne’e, iha kazu ativu hamutuk 1.073, signifika katak durante loron ne’e nia laran rekupara de’it 199, nune’e presiza hadi’a jestaun ba izolamentu,” nia akresenta.

Tuir Komodoro Pedro Klamar Fuik, presiza aplika Serka Sanitária no Konfinamentu Jerál tanba períodu inkubasaun iha loron-14 nia laran, ne’ebé bele iha auto-rekuperasaun no evita transmisaun hosi ema ida ba ema seluk.

“Esforsu hotu tau hamutuk tuir rekursu ne’ebé iha hodi halo tratamentu ba kazu sira la rekupera iha loron-14,” nia akresenta.

Aleinde ne’e, CIGC mós husu atu Polísia Nasionál Timor-Leste (PNTL) no FALINTIL-Forsa Defeza Timor Leste (F-FDTL) halo fiskalizasaun ho rigór. 

“Tanba ita la lakon batalla, maibé dezafiu ne’ebé mak ita hasoru mak presiza kombate uluk hanesan ignoránsia no falta konsénsia, tanba ne’e atu atinje tenke halo sidadaun hamutuk vense luta hasoru COVID-19,” nia enkoraja.

CIGC mós nota katak falta kolaborasaun hosi sidadaun sira atu kombate COVID-19 no falta mós inisiativa públika atubele redús karga emosionál no psikolojia ne’ebé provokadu hosi kalamidade nasionál hanesan dezastre naturál no kombate COVID-19.

“Ita falta mós komunikasaun estratejia ne’ebé di’ak hosi Estadu no organizmu hotu iha sosiedade no públiku ein jerál. Ita presiza mellora kombate, liu-liu halo kontrola iha fronteira ho desizasaun ida de’it, aumenta rekursu umanu COVID-19, kria espasu ba kuarentena no suspende pasajen internasionál ba ema inklui bandu halibur malu no intensifika Serka Sanitária,” nia akresenta.

Alende ne’e, nia dehan, presiza mellora mós kontrolu auto-kuaretena no auto izolementu inklui halo prevensaun ba kontájia iha insititusaun save sira.

“Ita ko’alia Estadu Emerjénsia karik rigór iha fronteira no rigór iha Serka Sanitária durante loron 28 no halo kampaña informasaun fó apoiu sosiu ekonómiku,” nia akresenta.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here