Membro Deputado PUDD, António de Sá Benevides. Imajen/Egas Cristovão.

DILI, 28 abríl 2021 (TATOLI)—Bankada Partidu Unidade Dezenvolvimentu Demokrátiku (PUDD) iha uma fukun Parlamentu Nasionál, husu Governu atu tetu didi’ak desizaun sira molok estende serka sanitária no konfinamentu obrigatóriu tanba komprova ona ba atividade ekonómika iha rai laran.

“Serka sanitária no konfinamentu obrigatóriu ne’e kompeténsia Governu atu regula tuir dekretu Governu nian, maibé Bankada PUDD husu ba Governu kualkér desizaun ne’ebé Governu foti tenke sukat ho didi’ak atu labele prezudika Governu nia-aan rasik no liuliu prezudika ita-nia povu,” Xefe Bankada PUDD, António de Sá Benevides, fó hanoin ba Governu liuhosi debate renovasaun estadu emerjénsia ba dala-XIII iha Parlamentu Nasionál, kuarta ne’e.

Nia akresenta, karik Governu sei hanoin atu estende serka sanitária iha Dili no munisípiu balun tenke kria kondisaun ne’ebé justu ba povu, traballadór no estudante sira hotu.

“Se ita deside aplika serka sanitária no konfinamentu obrigatóriu karik, ita tenke kria mós kondisaun. COVID-19 mai la haree ema kiik ka ema boot, la haree ema polítiku ka ema bainbain maibé se ema mate hamlaha só ema ki’ak mak bele mate hamlaha. Ita lakohi povu mate tanba de’it hamlaha,” Bankada PUDD propoin.

Ezisténsia surtu COVID-19, nia dehan, iha mundu inklui Timor-Leste laiha ema ida mak dúvida tanba oho ona ema no Timor-oan mós mate ona ho COVID-19.

Iha inísiu estadu emerjénsia iha marsu  2020 liubá, PUDD husu Governu labele konsentra de’it ba COVID-19 maibé tenke haree ba moras seluk hanesan Tuberculoze (TBC), dengue, diabetes no moras seluk tán, ne’ebé iha poténsia boot oho komunidade.

“Dalan luan loos ba COVID-19 atu oho ita-nia komunidade bainhira ita la tau importánsia atu prevene no kura moras seluk ne’ebé ha’u mensiona ne’e,” Xefe Bankada PUDD ne’e hateten.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here