Deputadu Francisco Branco. Imajen/TATOLI

DILI, 28 abríl 2021 (TATOLI)—Bankada parlamentár kompostu hosi Frente Revolucionária de Timor-Leste Independente (FRETILIN), Partido Democrático (PD) no Frente-Mudança (FM) husu lideransa nasionál atu hatudu unidade iha prevensaun no kombate propagasaun surtu COVID-19 tanba Dili tama iha transmisaun komunitária.

“Líder hotu-hotu ami apela, povu tomak no oan sira hotu, mai ita hamutuk luta kombate COVID-19. Hamutuk ita bele,” Deputadu Bankada FRETILIN, Francisco Miranda Branco, levanta iha estensaun estadu emerjénsia ba dala-XIII, iha Parlamentu Nasionál, kuarta ne’e.

Líder sira presiza iha lian ida no tau forsa hamutuk hodi kombate moras COVID-19 ne’e, tanba oras ne’e kontinua hamate ema iha mundu hanesan ezemplu hatudu iha India ne’ebe halo ema barak mate.

Nune’e mós, Xefe Bankada PD, Deputadu António da Conceição ‘Kalohan’, hateten moras invizivel ne’e presiza Timor-oan sira tau forsa hamutuk.

Tanba, nia dehan, ezisténsia COVID-19 iha Timor-Leste nu’udar faktu ne’ebé tenke ser lamenta tanba Timor-oan na’in-tolu mak mate ona.

Faktu seluk mak númeru pozitivu COVID-19 iha Timor-Leste ne’e kada loron sa’e, tanba ne’e Timoroan hotu tenke fó hanoin ba malu hodi halakon moras ida-ne’e.

“Ita bele halo polítika maibé polítika ne’e atu Governa no proteje, tanba ne’e ami nafatin apela nasaun ne’e bolu ita tau esforsu hamutuk hodi salva uluk povu, kontestasaun (polítika) sira ita hein lai tempu tuir mai,” nia dehan.

Entretantu Xefe Bankada Frente-Mudansa, Deputada Isabel Maria Barreto Freitas Ximenes, husu ba líder nasionál sira hamutuk kontra moras invizivel ne’e.

Xefe Bankada Frente-Mudança (FM), Deputada Isabel Maria Barreto Freitas Ximenes. Imajen TATOLI/Evaristo Soares Martins.

“Bankada Frente-Mudança rekomenda ba líder nasionál tomak tantu formál, informál, atu hatudu imi-nia unidade hanesan luta ne’ebé imi halo durante tinan 24 ba luta independénsia Timor-Leste ida-ne’ebé mak sai livre hosi inimigu Indonézia, tanba COVID-19 oras ne’e mak ita-nia inimigu númeru dahuluk iha Timor-Leste,” Deputada FM ne’e fó hanoin.

Deputada Isabel Freiras Ximenes nu’udar jerasaun foun no jerasaun kontinuadór ne’e, husu ba lideransa nasionál sira hamutuk atubele hasoru inimigu númeru dahuluk ne’e iha Timor-Leste.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here