Primeiru-Ministru, Taur Matan Ruak, akompaña ho Prokuradór Jerál Repúblika, José Ximenes, vizita edifísiu PGR iha Colmera, kinta (17/09). Imajen Tatoli/Egas Cristovão

DILI, 28 abríl 2021 (TATOLI)—Janeiru to’o dezembru 2020, Ministéiru Públiku (MP) finaliza prosesu krime hamutuk 5.350.

Relatóriu informasaun anuál 2020 ne’ebé Prokuradór Jerál Repúblika (PJR), José da Costa Ximenes relata iha Parlamentu Nasionál (PN)  tersa (27/04), proseu krime ne’ebé finaliza mai hosi Prokuradoria Distritál haat hanesan Dili, Baucau, Suai no Rejiaun Administrativa Espesiál Oe-cusse Ambeno (RAEOA).

Notísia relevante:PJR aprezenta informasaun anuál ikus ba PN

Deskrisaun atividade prosesuál (inkéritu sira) mak hanesan, Prokuradoria Distritál Dili inkéritu-krime  hamutuk 2.680, konta ho re-abertu rua no inkéritu 2.342 ne’ebé tranzitadu hosi tinan anteriór.

Konklui inkéritu 3.111, tanba ne’e, hosi inkéritu hirak-ne’e arkiva tiha inkéritu 1.669, akuza tiha ona inkéritu 1.427 no remesa tiha inkéritu 15.

“Halo análiza badak komparadu ida, haree katak númeru hosi inkéritu ne’ebé tama iha Prokuradoria Distritál Dili hosi 2.787 iha tinan-2019 tun ba 2.680 iha 2020, ne’ebé signifika redúz 4%. Iha kontrapartida, rejista tiha mós aumentu iha prosesu findu, 2.984 iha 2019 kontra 3.111 iha 2020, ne’ebé, iha termu komparadu-sira, korresponde ba aumentu ida besik 4%,” relatóriu informasaun anuál PJR ne’ebé Agência Tatoli asesu, kuarta ne’e.

Durante 2020, majistradu Ministériu Públiku ne’ebé hala’o knaar iha Prokuradoria Distritál Dili, intervein iha sesaun julgamentu-krime besik 2.553, hosi sesaun julgamentu-krime hirak-ne’e julgamentu móvel 116 no audiénsia primeiru interrogatóriu judisiál ho arguidu detidu 118.

Tuir fali, Prokuradória Distritál Baucau, durante 2020, Inkéritu-krime ne’ebé tama hamutuk 964, sura hamutuk ho 305 pendente-sira hosi 2019, nune’e sai tiha prosesu 1.269.

Iha 2020, konklui inkéritu hamutuk 869 hosi akuza 548, arkiva 313 no remete ba sksaun seluk 8.

Númeru hosi inkéritu ne’ebé tama iha Prokuradoria Distritál Baucau 964 iha 2020, kompara ho prosesu 808 ne’ebé tama iha 2019, signifika iha aumentu ida besik 19%.

Hosi sorin seluk, rejista mós diminuisaun ida iha prosesu findu-sira hamutuk 869 iha 2020 kontra 845 iha 2019, ne’ebé korresponde ho variasaun ida ne’ebé ladún signifikativu.

Durante tinan-2020, majistradu MP Baucau intervein iha sesaun julgamentu-krime hamutuk 982 no iha Prokuradoria Distritál Suai durante 2020 inkéritu-krime 1.166 sura hamutuk ho prosesu 412 ne’ebé tranzitadu hosi 2019 konklui inkéritu 899, hosi hirak ne’e 621 akuzadu, 271 arkivadu no hitu remesa ba sesaun seluk.

Diferensa entre númeru hosi inkéritu ne’ebé tama iha Prokuradoria Distritál Suai, iha 2020 rejista inkéritu hamutuk 754, no hirak ne’ebé tama iha 2019 hamutuk inkéritu 747, signifika rejista aumenta besik 1%. Findu iha 2020 rejista tiha hamutuk 899, iha 2019 rejista tiha hamutuk 715.

Hanesan temi ona kona-bá prosesu findu-sira iha 2020, rejista tiha aumentu ida besik 26% relativamente ba tinan anteriór.

Durante 2020, majistradu MP iha Suai atende sesaun julgamentu-krime hamutuk 1.303, audiénsia primeiru interrogatóriu judisiál ho arguidu detidu 17.

Iha Prokuradoria Repúblika Distritál Oe-cusse  inkéritu-krime iha 2020  hamutuk 374 sura hamutuk ho 141 inkéritu-krime sira ne’ebé tránzita hosi 2019.

Konklui  inkéritu 471, hosi hirak ne’e akuzadu 357, arkivadu 108, prosesu  6 remesa ba sesaun sira seluk nune’e prosesu 46 pendente ba tinan ida-ne’e.

Númeru hosi inkéritu ne’ebé tama iha Prokuradoria Oe-cusse, iha 2019 hamutuk 391 no númeru inkéritu ne’ebé rejista iha 2020 hamutuk 374, signifika ba tinan refere rejista tiha redusaun ida besik 4%.

Maibé, iha 2020, númeru hosi prosesu findu hamutuk 471, nune’e bele dehan, produtividade aumenta kompara ho tinan anteriór, bainhira konklui tiha inkéritu 299.

Durante 2020, Majistradu sira Ministériu Públiku ne’ebé serbisu iha Prokuradoria Distritál Oe-cusse intervein ona iha sesaun julgamentu-krime hamutuk 377.

Enkuantu, hosi tipu krime ne’ebé akumula hosi Prokuradória haat ne’e maka hanesan omesídiu, Violensia seksuál, ofensa integridade fízika, violénsia doméstika, krime ameasa, arma proibida, burla, danu, furtu no falsifikasaun.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here