Aviaun Malindo iha aeroportu Comoro. Imajen/Tatoli.

DILI, 27 abríl 2021 (TATOLI)—Timoroan na’in 35 ne’ebé viajen hosi Dili, no to’o iha Kuala Lumpur Malázia la admite atu tama ba United Kindom (UK), ho razaun seluk, la’ós tanba kestaun rezultadu teste COVID-19 ne’ebé hatudu negativu ka pozitivu.

Koordenadór Forsa Tarefa Prevensaun Mitigasaun Surtu COVID-19 iha Timor-Leste, Rui Maria de Araújo, klarifika asuntu ne’e liu hosi komunikadu, iha tersa ne’e.

Notísia relevante:Timor-oan 35 husu ajénsia viajen Narpov Ateita devolve osan viajen

“Aproveita oportunidade atu informa ba públiku katak, pedidu klarifikasaun liu hosi kanál diplomátiku ne’ebé Embaixada TL iha Malázia halo, Ofisiál Ligasaun hosi British High Commission iha Kuala Lumpur, informa katak, relasiona ho sira na’in 35 ne’ebé tenki fila mai Timor-Leste: ‘Each passenger was assessed and a decision made to determine if they were admissible to the UK. Those deemed so were allowed to travel onwards once new COVID Tests had been conducted and negative results received,” Rui Maria de Araújo kopia resposta ofisiál ne’ebé SIJK konfirma.

Tradusaun ba lian Tetun hanesan tuir mai ne’e: ‘kada pasajeiru sei evalua no halo desizaun hodi termina katak, sira-ne’e sei simu duni iha Inglatera ka la’e. Sira ne’ebé konsidera hetan autorizasaun hodi halo viajen kontinua bainhira teste COVID-19 halo ona no rezultadu simu hatudu negativu’.

Nia konsidera resposta iha leten, hatudu momós katak, sira na’in 35, la admite tama iha UK tanba razaun seluk.

Rui Maria de Araújo reforsa, bainhira Timoroan-sira ne’e prienxe kritériu sira-seluk, sira hetan permisaun atu halo viajen, nune’e mós bainhira halo fali teste COVID-19 ho rezultadu negativu, hanesan mós ho Timoroan-sira seluk ne’ebé halo duni viajen, tanba prazu limite teste oras 72 liu tiha ona.

Entretantu, Timoroan na’in 35 ne’ebé antes ne’e sosa billete hosi Ajénsia Viajen, Narpov Ateita, ho destinasaun Dili-Inglaterra, la to’o iha fatin destinasaun tuir billete ne’ebé sira sosa.

Timor-oan hirak ne’e konsege halo viajen to’o de’it iha Kualia Lumpur, Malázia (fatin tránzitu) no labele kontinua voo tanba falla iha prosesu administrasaun.

Maski nune’e, iha 24 abríl konsege fila-fali mai Dili ho ajuda hosi Responsável ba ekipa Fly Timor, Pedro M. Carrascalão, Embaixada Timor-Leste iha Malázia no Malino Air.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here