Ministru Defeza, Filomeno da Paixão de Jesus. Imajen Tatoli/Egas Cristóvão.

DILI, 27 abríl 2021 (TATOLI)—Primeiru Ministru (PM) Taur Matan Ruak, preokupa ho sendimentasaun iha portu Navál Hera, kauza hosi inundasaun ne’ebé akontese iha 04 abríl.

Tanba ne’e, Taur Matan Ruak husu ona Ministru Defeza (MD), Filomeno da Paixão de Jesus, atu buka solusaun hodi rezolve problema ne’e.

Notísia relevante:Inundasaun estraga fasilidade balun iha Aeroportu Comoro

“Primeiru Ministru bolu ha’u tanba preokupadu ho situasaun iha portu Navál Hera. Foin lalais mota tun makaas hosi Remexio hamosu sendimentasaun boot iha portu Hera, difikulta ita-nia maluk Australianu-sira ne’ebé ajuda ita atu harii portu ba ró militár rua ne’ebé sira atu oferese ba ita,” Filomeno da Paixão de Jesus, hateten iha rezidénsia Primeiru Ministru, Faról, Dili, tersa ne’e.

Ministru Defeza dehan, Xefe Governu ho Ministru Obra Públika (MOP) rasik halo ona vizita hodi mobiliza ekipamentu atu hadi’a mota-dalan, nune’e labele fó impaktu ba prosesu konstrusaun portu Hera.

Governu halo ona esforsu atu harii moru protesaun hodi satan mota Hera bele sees ba karuk parte loron-monu nian, nune’e evita sendimentasaun bainhira mota tuun.

“Ita sei hadi’a bee dalan atu mota ne’e sees oitoan ba parte loron-monu nian hodi evita sendimentasaun,” nia esplika.

Governante ne’e sei kontinua koordena ho Governu Austrália liu hosi militár Australianu-sira atu kontinua prosesu harii obra portu Navál Hera to’o entrega ró militár rua ba Governu Timor-Leste (TL) iha 2023.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here