Ministra Saúde, Odete Maria Freitas Belo. Imajen Tatoli /Egas Cristovão

DILI, 27 abríl 2021 (TATOLI)Tuir klasifikasaun hosi Organizasaun Mundiál Saúde (OMS), munisípiu Dili hahú tama ona transmisaun komunitária ba COVID-19, tanba haree evolusaun kazu ativu kada loron.

Ministra Saúde, Odete Maria Freitas Belo, hateten, Ministériu Saúde (MS) rejista pozisaun OMS maibé seidauk haree Timor-Leste tama ba klasifikasaun transmisaun komunitária.

“Kona-ba tama transmisaun komunitária ka la’e, Ministériu Saúde rasik seidauk hetan informasaun maibé iha hela nível diskusaun katak ita iha tendénsia atu ba duni iha transmisaun komunitária,” Ministra Saúde relata hafoin ramata enkontru ho Primeiru-Ministru, Taur Matan Ruak, iha Rezidénsia Farol, tersa ne’e.

Notísia relevante: COVID-19: tuir klasifikasaun OMS, Dili hahú tama transmisaun komunitária

Tuir Ministra, Governu iha ona planu kontinjénsia ne’ebé klaru tebes, tanba ne’e bainhira rejista ona kazu transmisaun komunitária maka sei aplika medida prevensaun ne’ebé rigorozu.

“Ita-nia planu kontinjénsia klaru iha ne’ebá, iha medida balun rigorozu liután ne’ebé mak sei foti bainhira ita deklara duni katak tama ona iha situasaun transmisaun komunitária nian,” nia akresenta.

Tuir governante ne’e, medida hirak ne’e Governu mak sei deside liuhosi reuniaun Konsellu Ministru.

Biban ne’e, Ministra Saúde informa mós ba Primeiru-Ministru, relasiona ho espasu kuarentena no izolamentu sei sufisiente atu akomoda sidadaun sira.

“Iha ajénsia barak mak iha interese hakarak ajuda Timor-Leste bainhira tama ona senáriu transmisaun komunitária,” nia subliña.

Aleinde ne’e, Haree ba kazu pozitivu hahú espalla ba munisípiu sira, nune’e Diretór Saúde sira iha munisípiu Baucau, Manufahi, Manatuto no munisípiu seluk hahú identifika ona eskola sira hodi uza ba izolamentu no kuarentena.

Ministra apela ba públiku tomak atu nafatin kumpre regra prevensaun COVID-19, hanesan uza máskara, fase liman bebeik ho sabaun, distánsia sosiál no seluk tan, nune’e evita kontájiu vírus.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here