Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 27 abríl 2021 (TATOLI)—Ministériu Petróleu no Minerál (MPM) no Autoridade Nasionál Petróleu no Minerál (ANPM) planeia re-avalia prosedimentu fó lisensa ambientál ba empreza nasionál no internasionál hodi hala’o atividade pedreira no kee rai-henek hodi evita risku ba dezastre naturál.

“Ita haree katak iha nesesidade atu re-evalia fali prosedimentu lisensa ambientál ne’ebé uluk estabelesidu tanba deskonfia katak empreza balun la tuir regra tanba kee mota to’o rai ten sira ne’e tuun hodi fó risku ba dezastre naturál,” Ministru Víctor hateten ba Agência TATOLI iha Parlamentu Nasionál, tersa ne’e.

Ministru konsidera presiza re-analiza tanba MPM no ANPM hanesan instituisaun sira ne’ebé foku ba ambiente iha parte minerál, gás no petróleu.

Entidade rua haree mós ba empreza ne’ebé hatama proposta no husu lisensa, ne’ebé ekipa autoridade sira tenke tuun ba terrenu hodi halo estudu hafoin distribui lisensa ambientál.

Aleinde ne’e, MPM mós planu atu halo Rezolusaun Governu hodi submete ba Konsellu Ministru hodi haree ba situasaun no evita risku ba dezastre naturál.

“Ita presiza halo kontrolu regulár nafatin tanba durante ne’e hetan keixa katak empreza la tuir regra, tanba ne’e ita haruka suspende tanba dala-ruma sira bele halo menus ka liu la tuir regra,” nia akresenta.

Hafoin dezastre naturál, Governu atu tau-matan ba nesesidade nune’e sei estabelese vpontu okál hafoin halo estudu mapamentu ba fatin risku no proíbe halo atividade kee fatuk no rai henek.

“Ita hakarak ba oin, empreza sira ne’ebé hetan ona lisensa ambientál labele kee rai to’o ba mota  ninin hodi fó espasu ba ema atu halo uma iha mota laran tanba fó risku ba ema-nia vida,” nia akresenta.

Jonalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here