Ministru Justisa, Manuel Cárceres da Costa. Imajen Tatoli/Egas Cristovão.

DILI, 27 abríl 2021 (TATOLI)—Ministru Justisa (MJ), Manuel Cárceres da Costa, informa ba Primeiru Ministru (PM), Taur Matan Ruak, katak, Ministériu Obra Públika (MOP) liu hosi Institutu Jestaun Ekipamentu (IJE), sei destaka ekipamentu pezadu atu normaliza hikas mota Laclo, ne’ebé estraga natar no toos durante inundasaun iha 04 abríl.

“Informa ba PM katak MOP haruka ona IJE iha loron hirak liu-bá, no haree ona atu bele destaka ekipamentu pezadu, hodi normaliza mota nune’e bele rekopara neineik natar ho toos ne’ebé hetan estragu,” Manuel Cárceres da Costa hateten ba jornalista-sira, hafoin enkontru ho Xefe Governu, iha rezidénsia Faról, tersa ne’e.

Notísia relevante:Xanana halibur Manatuto-anan apoia vítima dezastre iha Manatuto

Ministru Justisa atualiza situasuan ne’e tanba, foin lalais ne’e hala’o vizita hodi haree besik liu-tan efeitu hosi inundasaun iha Postu Administrativu Laclo, Munisípiu Manatuto.

Entretantu, foin lalais ne’e Administradór Postu Administrativu Laclo, Samuel Rodrigues Pereira relata katak, dezastre naturál ne’ebé akontese iha 04 abríl provoka udan, anin hodi halo inundasaun makaas rezulta ema na’in-neen mak mota lori, na’in-ida hetan on ani-isin mate, maibé na’in-lima seluk seidauk hetan.

Dezastre ne’e estraga mós natar povu-nian kuaze ektare 5.000 no estraga to’os hamutuk ektare 200, sobu kolam ikan 60 ne’ebé atu koleta daudaun, inklui estraga mós plantasaun no lori animal lubuk ida.

Alende ne’e, iha uma tolu mak hetan estragu totál, uma 25 mak bee tama no uma 28 sai ameasa boot ba inundasaun.

Oras ne’e daudaun komunidade evakua provizóriu ba sede suku no salaun parokiál, hodi hein  situasaun rekopera, sei fila-fali atu hadi’a sira-nia uma.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here