Ministra Saúde, Odete Maria Freitas Belo. Imajen TATOLI /Egas Cristóvão

DILI, 27 abríl 2021 (TATOLI)-Ministra Saúde, Odete Maria Freitas Belo, rejeita informasaun katak rezultadu teste Polymerase Chain Reaction (PCR) ne’ebé analiza iha Laboratóriu Nasionál (LABNAS) Timor-Leste laiha kualidade, tanba durante ne’e timor-oan rasik no estranjeiru sira bainhira atu sai ba rai-li’ur lori rezultadu hosi ne’e no laiha problema durante viajen.

“Ha’u lahatene informasaun teste laboratóriu ba PCR laiha kualidade. Ha’u atu deklara katak Laboratóriu Nasionál ne’e ida de’it no atualmente halo atividade teste ba ema ne’ebé presiza no mákina halo analiza ba amostra sira. Entaun ha’u nafatin hateten katak Laboratóriu Nasionál nia teste iha kualidade,” Ministra Saúde relata hafoin ramata enkontru ho Primeiru-Ministru (PM), Taur Matan Ruak, iha Rezidénsia Farol, tersa ne’e.

Notísia relevante: Timor-oan 35 husu ajénsia viajen Narpov Ateita devolve osan viajen

Governante ne’e hato’o lia hirak ne’e tanba bainhira timor-oan 35 atu halo viajen hosi Dili-Inglaterra, bainhira halo tránzitu iha Kuala Lumpur, Malázia, parte imigrasaun sira identifika dokumentu pasajeiru la prenxe rekezitu, liuliu rezultadu teste PCR.

Ministra konsidera, presiza duni identifika no buka hatene dokumentu teste PCR ne’ebé mak scan de’it.

“Normalmente kuandu ita atu bá rai-liur, la’ós na’in-haat ou na’in-lima de’it maibé ema barak no la’ós timor-oan de’it maibé ho estranjeiru sira ne’ebé hakarak ba vizita sira-nia família mós antes sai halo teste PCR no Laboratóriu Nasionál mak halo teste no fó sai rezultadu analiza, ne’ebé durante ne’e laiha problema,” nia akresenta.

Ministra kompromete sei buka hatene problema ne’ebé akontese atu buka solusaun.

“Ministériu Saúde no Laboratóriu Nasionál sei buka solusaun, liuhosi Ministériu Negósiu Estranjeiru no Kooperasaun no ajénsia ne’ebé trata viajen sira hodi husu loloos problema ne’e iha saida mak sira haruka karta mai no tuir karta ne’ebé ami simu, ema sira ne’e fila la’ós tanba kualidade teste PCR maibé iha dokumentu balun mak sai kestaun ba sira,” nia subliña.

Jornalista: Antónia Gusmão

Editora: Julia Chatarina

PUBLISIDADEiklan

1 KOMENTÁRIU

HAKEREK NO HATÁN

Please enter your comment!
Please enter your name here