Produtu lokál iha Loja Agrikultór. Imajen TATOLI/Florêncio Miranda Ximenes

DILI, 27 abríl 2021 (TATOLI)—Ministériu Agrikultura Peska (MAP) sei sosa karreta tolu hodi fasilita transporta produtu lokál hosi munisípiu mai Dili, nune’e bele fa’an iha Loja Agrikultór iha Supermerkadu Meimart no Timor Plaza.

Tuir Diretór Agro-Komérsiu no Kooperasaun Setór Privadu hosi MAP, Fernado Egidio Amaral, hateten, programa prinsipál diresaun maka sistema transportasaun produtu ho di’ak no armazenamentu ne’ebé iha ligasaun ho sentru kolokasaun produtu.

“Ita  sosa karreta tolu ho kustu $123.000, ne’ebé iha truck ai ida atu tula de’it foos ho produtu ne’ebé maka bele aguenta no la a’at lalais. Ha’u komunika ona ho Señor Ministru atubele aselera, nune’e karreta tolu ne’ebé ita propoin, bele aselera prosesu aprovizionamentu, nune’e karreta bele to’o ona atubele halo intervensaun ,” Diretór dehan ba Agência TATOLI, iha ninia knaar fatin, edifísiu MAP, Comoro, tersa ne’e.

Enkuantu, karreta rua seluk sei halo movimentu tula modo tanba nota katak populasaun iha kapitál Dili konsumu barak modo no aifuan.

“Infelizmente produtu sira ne’e a’at lalais, tanba ne’e agora kuandu durasaun transportasaun  lori oras neen ho kondisaun produtu sira habai iha loron laran no laiha fatin hanesan refrijeradór ne’ebé maka di’ak, maka molok to’o Dili produtu namlaik no balun a’at. Entaun ida-ne’e problema, tanba ne’e presiza iha transporte rua atu asegura,” nia akresenta.

Aleinde ne’e, Diresaun Agro-Komérsiu sei halo mini armazen iha Hudi Laran, ne’ebé maka tau refrijeradór rua ho temperatura labele liu grau sélsiu 23.

“Nune’e, bainhira iha modo ka tomate ne’ebé mai, ita bele rai loron 15 to’o 20 maibé bainhira laiha refrijeradór, loron lima de’it a’at ona tanba kapasidade kompra menus,” nia hatutan.

Tuir Responsável Loja Agrikultór Dili ne’e, prosesu akizisaun tama ona aprovizionamentu.

“Prosesu aprovizionamentu ne’e bele lori fulan tolu to’o neen, tanba ne’e ha’u ko’alia duni ho Señor Ministru no Diretór Aprovizionamentu atubele fasilita prosesu, espera katak iha abríl nia rohan ka inísiu maiu, ita bele hetan ona karreta tolu ne’e hodi iha kondisaun mínimu responde ba kestaun falta produtu lokál iha Loja Agrikultór.

Notísia relevante: Produtu lokál iha Loja Agrikultór Dili hahú menus

Nia haktuir, bainhira hahú períodu Serka Sanitária iha Dili, akontese ona kuaze loron haat modo, tomate no aifuan menus.

“Ha’u tama iha supermerkadu ida ba ida no ami komunika ho Sala Situasaun-Sentru Integradu Jestaun Krize (CIGC, sigla portugés), nune’e ho karreta Loja Agrikultór ba iha pontu  entrada Dili hodi simu produtu.

Nune’e mós, kondisaun estrada a’at difikulta transporta produtu no bainhira to’o Dili halo modo a’at no kualidade tuun maka’as.

“Tanba ne’e ho karreta bele ajuda fasilita konetividade transportasaun produtu lokál hosi área rurál ba área urbana no to’o iha Dili ho kondisaun produtu di’ak,” nia tenik.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here