DILI, 27 abríl 2021 (TATOLI)—Xefe Suku Fatuhada, postu administrativu Don Aleico, munisípiu Dili, Marcelino Soares, informa nia parte submete ona dadus komunidade afetadu dezastre naturál ne’ebé akontese iha domingu (04/04) ba Ministériu Administrasaun Estatál (MAE) hodi hetan apoiu.
“Levantamentu dadus inundasaun submete ona, komunidade hamutuk 850 mak afetadu maioria kuaze sira-nia uma ho kondisaun grave,” Autoridade lokál ne’e dehan ba Agência TATOLI, tersa ne’e.
Xefe suku haktuir, iha semana kotuk ne’e, xefe aldeia ba konfirma Sekretaria Estadu Protesaun Sivíl (SETP) ne’ebé falta pakote sasán balun maka seidauk iha no bainhira kompletu ona maka sei distribui ba komunidade.
Aleinde ne’e, tuir Autoridade suku, antes ne’e ajensia internasionál sira mós foti ona dadus komunidade afetadu iha suku ne’e.
“Organizasaun Naun Governamentál (ONG) internasionál hanesan CARE International, IOM, UNDP, Plan International, inklui Uniaun Europeia sira mai hotu mai suku ne’e hodi haree kondisaun no halo levantamentu dadus,” nia akresenta.
Xefe suku Fatuhada ne’e dehan, durante inundasaun, sasán barak maka a’at maibé to’o agora seidauk hetan apoiu ruma.
Antes ne’e, MAE simu ona dadus provizóriu vítima afetadu inundasaun hosi munisípiu 12 inklui Rejiaun Administrativu Espesiál Oé-cusse Ambeno (RAEOA) hamutuk 21.889.
Daudaun ne’e, sentru evakuzaun iha Dili hamutuk 31 ho totál uma-kain ne’ebé destakadu hamutuk 15.876.
Iha 16 abríl, refujiadu balun ne’ebé hela iha sentru evakuasaun hahú fila ona ba sira-nia uma no hirak ne’ebé sei hela iha sentru evakuasaun hamutuk 7.246.
Jornalista: Natalino Costa
Editora: Julia Chatarina
