Klibur Estudante Universitáriu Postu Administrativu Remexio (KEUPAR) Munisípiu Aileu. Imajen Tatoli/Arminda Fonseca

DILI, 27 abríl 2021 (TATOLI)-Klibur Estudante Universitáriu Postu Administrativu Remexio (KEUPAR) Munisípiu Aileu, husu ba Governu liuliu ba ministériu kompetente atu hadi’a lalais estrada boot Beluruk liga ba Postu Administrativu Remexio ne’ebé kotu.

Portavós KEUPAR, Luiza Fernandes da Silva hateten, Governu liuhosi Ministériu Obras Públika presiza tebes hadi’a lalais estrada Remexio tanba bainhira akontese dezastre naturál iha loron 04 abríl liubá, estrada kotu to’o agora besik ona fulan seidauk hetan apoiu emerjénsia.

“Relasiona ami-nia estrada ne’ebé mak kotu totál, husu ba Ministériu Obras Públika (MOP) no Institutu Jestaun Ekipamentu (IGE), atu bele tau konsiderasaun sériu ba estrada ligasaun Beluruk ba Postu Administrativu Remexio ne’ebé mak kotu totál,” Luiza Fernandes da Silva hateten ba jornalista sira liuhosi konferénsia imprensa iha Kampus Universidade Nasionál Timor Lorosa’e (UNTL), Dili, tersa ne’e.

Portavós ne’e hateten, Governu presiza hadi’a lalais estrada Remexio atu nune’e komunidade bele asesu fila-fali dalan refere hodi bele buka moris, liuliu Saúde tanba durante semana tolu ona, moras ruma ekipa saúde ho família sira hulan de’it pasiente la’o to’o kilómetru lima mak to’o estrada boot.

Iha fatin hanesan, responsavel Estudante Postu Administrativu Remexio, Pedro da Conceição Fernandes realsa katak, Autoridade Postu Administrativu Remexio hato’o ona proposta ba ministériu relevante maibé to’o agora seidauk iha  resposta ruma.

Nia hatutan, Postu Administrativu Remexio populasaun maioria moris ho vida agrikultura, maibé daudaun ne’e sira-nia produtu labele lori ba merkadu tanba estrada ladi’ak.

Administradór Munisípiu Aileu, Abel da Concenção hateten, realidade daudaun ne’e Postu Administrativu Remexio labele halo viajen ba Aileu Vila tanba estrada kotu, maibé nia parte komunika ona ba Prezidente IGE, katak semana ne’e sei mobiliza ekipa pezadu ba Postu Administrativu Remexio.

“Ha’u ko’alia ho Prezidente IGE katak semana ida ne’e parese hahú aban ekipamentu pezadu mai ona Postu Administrativu Remexio atu normaliza estrada Remexio ne’ebé kotu,” nia hateten.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here