Passaporte eletróniku komún kór me’an no diplomata kór metan. Foto/espesiál.

DILI, 27 abríl 2021 (TATOLI)—Ministru Justisa (MJ), Manuel Cárceres da Costa, hateten durante situasaun COVID-19, Governu bele uza nota diplomasia atu atende Timoroan-sira ne’ebé hakarak halo renovasaun ba passaporte inválidu iha diaspora.

“Ministériu Justisa haruka no husu ona ba Ministériu Negósiu Estranjeiru no Kooperasaun (MNEK), atu kontaktu ita-nia Embaxada-sira iha nasaun ne’ebé ita-nia sidadaun iha, hodi haruka nota diplomasia,” Manuel Cárceres da Costa, hateten ba jornalista Agência Tatoli iha Faról, tersa ne’e.

Notísia relevante:Timoroan iha diaspora husu Governu kontinua tau matan ba sira

Ministériu Justisa uza meiu ida-ne’e, tanba sistema passaporte eletróniku Timor-Leste (TL), ema ne’ebé passaporte inválidu na’in mak tenke mai renova, maibé mundu tomak enfrenta situasaun COVID-19, halo sirkulasaun aviaun ladún iha, nune’e Timoroan-sira ne’ebé passaporte inválidu labele fila-mai.

MJ-rasik labele haruka tékniku-sira ba estranjeiru atu atende direta sidadaun-sira hodi halo renovasaun ba passaporte.

Governante ne’e dehan, nota no meiu diplomasia ne’e MNEK mak haruka atu bele husu ba Estadu-sira ne’ebé Timoroan-sira hela bá, katak, bainhira Timoroan ne’ebé passaporte inválidu presija rekoñese nafatin no labele foti sansaun.

“Hanesan mós ita halo ba sidadaun estranjeiru-sira ne’ebé hela iha TL durante situasaun COVID-19,’’nia dehan.

Antes ne’e, tuir pedidu ne’ebé Serbisu Rejistu Notariadu halibur, iha Timoroan 1.000-resin ne’ebé hala’o estudu no serbisu iha Portugál, Cavo Verde, Koreia Súl, Irlanda Norte, Inglaterra, Filipina, Tailándia ho sira seluk-tan mak hato’o katak, sira-nia passaporte inválidu no labele fila-mai TL.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here